A.S.R.

A climatoloxía axudou e os vistantes responderon o sábado á convocatoria da II Feira do Queixo de Sillobre en maior número que en 2025, cunha ampla representación tamén de fabricantes e de produtos galegos. O resultado, xa que logo, cadra co período de consolidación e coa certeza de que en 2027 volverase celebrar o encontro nesta parroquia de Fene  (A Coruña).

A visita das casetas, a degustación e a compra de queixos e doutros produtos de alimentación e artesanía só se víu ameazada pola chuvia aló polas tres da tarde, cun lixeiro aceno  que se disipou pronto.

O mesmo que sucedeu na feira do ano anterior, a cocina en vivo e en directo volveu acaparar cara ao mediodía a atención de moitos visitantes, que seguiron as evolucións do cociñeiro José Loureiro, profesor da Escola de Cociña Icook de Fene, quen a partir do queixo fresco e do requeixo locais preparou unha boa sotelada de apetitosos petiscos.

​En cuestión de vendas, A queixería local Sillobre -organizadora do evento, xunto coa Sociede Agarimo- malia un maior remanente de produto que en 2025, xa non tiña practicamente existencias aló pola unha da tarde. Así que cara a 2027 o máis prudente sexa deixar o pedido feito mentres haxa existencias. E, desde logo, cabería apostar e programar con tempo a asistencia e colaboración cun feiral que ten vocación de continuidade e o compromiso de seguir apostando pola economía da contorna. 

QdeG
​
Este sábado, 26 de setembro, a parroquia fenense  de Sillobre (A Coruña) celebrará a II Feira do Queixo, na que colocarán posto 11 fabricantes e distribuidores do produto. Haberá tamén postos de artesanía, cestería e coiro.

A feira abrirá as súas portas ás 10 da mañá e pechará ás 18,30 da tarde. A actividade desenvolverase no adro da igrexa parroquial de Santa Mariña. E se chove: que chova!, porque os organizadores -Gandaría Sillobre e Sociedade Cultural, Recreativa e Deportiva Agariño-  dispoñen dun recinto cuberto a uns metros dalí. Pero as expectativas meteorolóxicas oriéntanse máis cara o bo tempo.

Haberá queixos das catro denominacións de orixe protexida galegas, cunha ampla representación dos ecolóxicos, e non faltarán outros de fóra de Galicia, mel complemento dun requeixo como o que ofrece Gandaría Sillobre, produtos de alimentación diversos e pan  -que o pulpo xa vén por diante en calquera feiral deste país-.

E para os amantes do petisco en vivo e en directo, o profesor da Escola de Cociña Icook de Fene José Loureiro repetirá experiencia con pratos acaídos para a ocasión. En 2025 trunfou cun rissoto con setas á galega e queixo fresco de Sillobre e uns ñoquis de grelos recheos de queixo local.

G.S.Lourido

O concello coruñés da Capela volveu pechar con éxito a nova edición da Festa do Requeixo. O bo tempo turrou da asistencia de visitantes, que mercaron máis de 3.000 terrinas do produto, un dos que fabrica con éxito a Cooperativa Campo Capela, aínda que sen deixar atrás outras referencias que levan ao recoñecemento e fan as ledicias de padales non só dos galegos, senón dos nacionais e internacionais.

Ilustrou e fixo sen dúbida prosa poética a profesora, historiadora e escritora ferrolá Marga Sánchez Yáñez, quen en calidade de pregoeira dixo do requeixo local que a celebración de hoxe é, en realidade, una festa dedicada á vaca, xa que foi “a única fonte de ingresos” e a que aportaba o único abono que se tiña noutros tempos. Hoxendía, coas medidas que se foron tomando, quedaron atrás entrañables imaxes como as de “levar o leite as casas, ou ir ás feiras coa manteiga con adorniños feitos coa culler", dixo.

​”Engadiu que este domingo “celébrase” na Capela o requeixo e que seu frescor “tráenos as lembranzas de todo o Concello”.

A Capela, terra meiga

Entre os adornos literarios, o primeiro foi debuxar ao concello como “terra meiga” e falou da virxe das Neves ou de Caaveiro, paraxe este último para deixarse levar pola paisaxe, o río, as follas das árbores…, e ao que non dubidou en referirse como “un paraíso”.
​
Os queixeiros

Entre outros moitos postos e propostas para atraer a atención dos asistentes, achegáronse ao recinto feiral das Neves queixerías e vendedores como Cortes de Muar, Gaia, Campo Capela, Gandeiría Sillobre ou Casa Curtis.

​A.S. Rocha

Segue a ser moi certo iso de que cada quen conta a feira tal e como lle vai nela. E na Semana Verde deste ano, que acaba de pechar as súas portas neste luscofusco dominical, os máis de quince fabricantes e distribuidores que asentaron posto estes últimos días no recinto feiral de Silleda, non fixeron moitos espaventos polas vendas.  Hai moito que visitar, moito do que se sorprender, desfrutar e probar, e nos queixos tamén.

Pechou esta 48ª Feira Internacional Abanca Semana Verde de Galicia e os seus certames paralelos cunha asistencia global nos catro días de apertura de algo máis de 108.000 persoas.   

Unha hora antes do peche, un sistema de cámaras con información intelixente, situadas nas entradas do recinto silledense, tiñan avaliadas as visitas. Uns milleiros menos que en 2025. Houbo unha mellora na cifra de expositores directos nos últimos 19 anos, cun total de 793 empresas e entidades de seis países, un 4,6 máis que en 2025.

Salimat, Turexpo Galicia e Festur-estas dúas últimas co apoio da Axencia de Turismo de Galicia- contaron con moitas empresas e participaron 50 concellos que promocionaron 66 festas galegas de interese turístico, a maior cifra deste evento.

Da Semana Verde deste ano saíron referencias e novidades como as da Finca Casa Barbeiro, ás que se lle vai ter que prestar moilta atención -incluído o seu requeixo-, as propostas de Monte Ceo, Casa Zolle, ou clásicos como os premiados Arzúa-Ulloa ou Tetilla de Queinaga, os deliciosos repertorios de Hoxe, Brigantia, Lácteos Bretón, Dona Cobina, Queixerías do Eume, Larsa ou o inefable requeixo das pontevedresas terras das Neves.

Antonio S.  Rocha

A Feira de Queixos de  Pontedeume (A Coruña) volveu lucir esta pasada fin de semana con luz propia, cun amplo repertorio de actividades para todos os públicos e con reclamos  curiosos como os cantos de taberna, catas técnicas das denominacións de orixe galega ou presentacións e degustacións dalgunos dos fabricantes asistentes. E causou tamén especial atención a poxa solidaria de queixos singulares, todo por unha boa causa e mellor destino, a Asociación Española contra o Cancro en Ponteume.

Alguén comentou que con máis -moitas máis- iniciativas como a referida  faise camiño tamén para loitar eficazmente contra a enfermidade, porque o importante neste caso non é xa tanto a recadación -que tamén- como o compromiso adquirido é o exemplo que se dá cara accións futuras.

Na poxa participaron moi activamente tres queixerías, que aportaron os seus produtos. Unha a de Carlos Reixa (Santo André), que achegou unha peza de máis de dez quilogramos e oito meses de maduración da denominación de orixe protexida (DOP) Cebreiro; outra, da queixería arzuana  Galmesán, con sete quilogramos e tres meses de maduración; e a terceira,  un ‘Pata de mulo’ da queixería artesanal  Payuelos (León), de cinco meses de maduración.

Bicos con sabor a requeixo

Xunto cunha remodelación do recinto feiral -na alameda de Raxoi- que lle deu máis amplitude ao público e a os expositores e vendedores de queixo, os visitantes tiveron a oportunidade de saborear e facer un corto pero axeitado brinde ao sol, cun xeado de requeixo, elaborado no concello curuñés da Capela. É só unha das pode que varias ducias de combinacións de marca Bicos de Xeado. As terrinas que se venderon esta fin de semana debéronse achegar a os dous milleiros.

Nesta ocasión, un bo referente do número total de congregados ao peche do encontro é o das rifas por compras entregadas aos asistentes. Foron 7.800 o sábado e 8.900 o domingo. Isto, xunto coa masiva asistencia rexistrada, apunta a que esa cifra de 15.000 do ano pasado puido verse rebasada, segundo Ana Vence, socia da Tenda Campo Capela e membro do Consello reitor da Cooperativa Agraria Provincial, en representación de Bico de Xeado.
​
Tamén volveron repetir e mesmo ampliaron cifras os mellores caldos das adegas Pagos del Rei, Félix Solís e Viña Casa Solís, que convidaron a milleiros de copas de viño, con produtos propios como Rías Baixas, Godello ou Mencía. Segundo o coordinador da área norte de España, Fernando Roca, ata o mediodía do domingo repartíronse de balde máis de 5.000.

QdeG

A Feira de Queixos de Pontedeume (Merca Queixo) entra esta fin de semana na súa segunda edición, con moi boas expectativas, xa que o tempo adornará as dúas xornadas, nas que é previsible que se repita ou mellore a asistencia de 2025. O restante queda da man dos organizadores, que volven  propoñer un amplo e variado programa de actividades para todos os públicos, incluídas as dos máis cativos.

Xunto cunha morea de queixerías en exposición e venda, haberá charlas-degustacións, charlas e maridanzas, cociña en vivo, concertos musicais, cantos de taberna, sorteos, obradoiros infantís ou sorteos de cestas de degustación  de produtos.

A feira de venta de queixos no municipio coruñés de Pontedeume terá lugar na alameda de Raxoi. Participarán fabricantes galegos e do resto de país, así como do veciño Portugal.

A xornada inaugural arrinca mañá, sábado, 25 de abril, ás dez e media, coa apertura da feira. O domingo, 26 de abril,  o feiral bota a andar ás once da mañá.


Programa do sábado

G.S.L.

A XXX Festa do Queixo San Simón da Costa non desmereceu das celebradas nos últimos anos, nas que os fabricantes amosáronse satisfeitos, polo que cabe concluír que o éxito segue acompañando este feiral, que conta cunha ampla representación de queixeiros de toda Galicia, así coma doutras autononomías e mesmo de fóra de España. Nesta ocasión abriu tamén un posto a European Cheese Route, asociación de concellos que persegue promocionar o queixo como oportunidade para o desenvolvemento local.

No ano 2024, a Festa do Queixo foi posiblemente a mellor. Houbo sol e os asistentes contáronse por milleiros. As vendas non quedaron atrás. Tamén no 2025, viñeron moitos visitantes e os fabricantes locais fixeron ‘caixa’ igualmente. Esta fin de semana, repetiuse a imaxe, con centos de visitantes degustando os queixos e mercando as mellores pezas, entre unha amplísima gama de referencias.

Mentres o concello vilalbés fala de que se superaron as expectativas, o Consello Regulador da  Denominación de Orixe Protexida (DOP) San Simón da Costa recoñeceu unhas vendas “espectaculares” durante o sábado, unha referencia que o domingo se repetíu  cando menos no número de asistentes, que na hora previa ao xantar volveron abarrotar a praza, augurando unha edición que podería mellorar a das últimas cinco edicións, segundo Lucía Fraga, secretaria do Consello Regulador da DOP San Simón da Costa.

Contribuiu ao éxito a aportación do apartado musical, que ten tamén un público ben sólido, sobre todo entre a mocidade. Para a ocasión contratáronse artistas como Mondra e 9Louro que congregaron o sábado a milleiros de persoas.

European Cheese Route

Un dos asistentes á Festa do Queixo foi a European Cheese Route, unha asociación de concellos que persegue promocionar o queixo como oportunidade para o desenvovemento local,  con temas como a cultura e o turismo queixeiros.

A asociación participa nas feiras galegas daqueles concellos que son socios, co que as queixerías constitúense como “embaixadoras dos nosos territorios”, segundo explicou Javier Sánchez, director da secretaría técnica deste colectivo.
​
Actualmente, forman parte do Ruta Europea do Queixo  os concelllos de Arzúa (A Coruña), Vilalba (Lugo) e Vilar dos Santos (Ourense).

A.S.R.

O municipio pontevedrés das Neves transfórmase cada ano durante a Semana Santa na capital do requeixo galego, recoñecemento que comparte a finais do mes agosto co concello coruñés da Capela, que tamén ensalza produto propio, curiosamente, na súa parroquia das Neves. Este venres e o sábado, a Sociedade Cooperativa Condado-Paradanta volveu levar ao evento dúas toneladas de requeixo, o que representa, aproximadamente, un 10 por cento da produción anual.

O requeixo con mel púidose degustar na carpa do recinto feiral a prezos populares (2,5 euros), ou levalo como sobremesa para a casa en paquetes dunha ducia, media ou tres unidades, sen olvidar a tarta fresca de requeixo ou a crema de requeixo.

O mel -o outro produto exaltado estes dous días- con botes dun quilogramo, 400 e 275 gramos, compartiu éxito de vendas, con propostas como a do mel con noces.

Sen variación nos prezos

Desde hai varios anos que o queixo e o mel que elabora a Cooperativa Condado-Paradanta non subiron os prezos, algo que destacou o presidente, Alejandro Martínez, quen dixo ademais que a tendencia é seguir mantendo a produción actual.

Requeixo e mel pódense comprar a través da páxina web da cooperativa, con envíos gratuitos a partir de 50 euros. 

Gonzalo S. Lourido 

Pedrafita brillou hoxe dobremente, pola celebración da súa feira anual do Queixo do Cebreiro e polo sol, que fixo acto de presencia e ás ledicias de milleiros de visitantes e dos máis de 150 postos de exposición e venda de productos agroalimentarios, que lle deron colorido e prestancia ao encontro. A nota documentada e en clave antropolóxica sobre a montaña lucense e as súas xentes, púxoa a pregoeira, Carmela López, alcaldesa de Burela e presidenta da Deputación de Lugo.

Na chaira do recinto feiral, ateigada de visitantantes, disque moitos procedentes de terras leonesas que se achegaron despois de asistir ás procesións da Semana Santa, Carmela López trasladóulle a veciños e visitantes “o valor que ten a xente da montaña”, porque con todas as dificultades do territorio, e deses servizos “que costa tanto traer”, o feito que se “viva aquí”, que se manteña, que se aposte por este produto -en relación co queixo- e por esta terra, “meréceo todo, porque é moi complicado vivir aquí”, reiterou.

Engadiu que a sanidade, a educación e demais servizos que para otras persoas están a dez minutos, “son algo complicado aquí”. “Para min, a xente da montaña mereceo todo, porque é moi complicado vivir aquí, e a xenta aposta polo territorio e por quedarse”, concluíu.

Queixo de primeiro e de sobremesa

Dixo tamén a pregoeira que ela podería vivir “comendo só pan e queixo”, para engadir que nas cousas máis simples esta o esencial, e iso é o que ten o voso queixo, por iso é tan especial”.
Dixo tamén que no rural non é un lugar no que faltan cousas, senón que é un lugar onde están as cousas realmente importantes.

Para a rexedora burelense, o queixo do Cebreiro é "un orgullo colectivo, o voso orgullo e o noso orgullo tamén", como igualmente “unha maneira de dicir quen somos” e “de compartir co resto do mundo o que temos”, argumentou. Por iso, valorou a importancia para un territorio manter celebracións como a de hoxe.

Fóra xa do pregón, Carmela López recoñeceu que o queixo “é o meu alimento favorito”, e que de nena, a súa avoa tiña unha tenda de ultramarinos e vendía todo tipo de queixos galegos. “Ou sexa  que coñezo o queixo desde moi pequeniña”, concluíu. 
​

QdeG

Galicia concentra esta fin de semana tres das súas feiras de queixos, dúas acollidas a algunha das denominacións de orixe protexida (DOP) e a terceira a do requeixo no sur da Comunidade Autónoma. As expectativas son boas, xa que os meteorólogos falan de continuidade do bo tempo. Cada unha delas, por méritos propios, colleitará milleiros de visitantes, aínda que  difíciles de concretar, co que a asistencia mídise máis pola gradualidade dos  ‘cheos’   e pola dimensión das  ringleiras de coches aparcados.

A primeira feira, como tódolos anos, desde hai 37 edicións, e coincidindo coa festividade do Venres Santo,  é a do Queixo do Cebreiro (Lugo), recoñecida como festa de Interese Turístico de Galicia.

A segunda, no concello pontevedrés de As Neves, é a Feira do Requeixo e Mel, que entra neste caso na súa 33 edición. Cadra coa de Pedrafita do Cebreiro, pero amplía a súa celebración ao sábado 4 de abril. Tamén está declarada de Interese Turístico de Galicia.

E pechando a semana, o municipio lucense de Vilalba, capital da Terra Chá (Lugo), celebra a Festa do Queixo San Simón da Costa. O domingo é o día grande, pero o sábado, día 4, tamén haberá actividades lúdicas e gastronómicas. Este queixo afumado fabrícase baixo  a denominación de orixe protexida San Simón da Costa, aínda que estes fabricantes elaboran tamén otros produtos como o  Queixo Tetilla ( Con DOP propia), o tradicional patelo desta zona, o requeixo e cada vez máis especialidades.

Pero cada feira/festa é un mundo, porque, arredor dos queixos locais ou comarcais, chegan cada vez con máis forza outros moitos queixos galegos, e algúns de España e de fóra, co que costa crer que a quen lle guste o produto non remate por mercar unha ou dúas pezas.

Máis feiras

Celebradas xa a Festa do Queixo Arzúa (A Coruña), a Feira de Moeche (A Coruña) e a do Queixo de Friol e Pan de Ousá (Lugo), e deixando  a un lado as dos próximos días,  quedan  pendentes no calendario anual galego a Feira de Queixos de Pontedeume (A Coruña), o 25 e 26 de abril; a Festa do Requeixo da Capela (A Coruña), o 30 de agosto; e a Feira do Queixo do Eume e do Mel de Goente (A Coruña), con data por decidir e que o pasado ano se celebrou o 12 de outubro.