Salomé Beiroa e André Arzúa, en plena execución dos petiscos que degustaron os visitantes da Feira do Queixo do Eume e do Mel de Goente
A.S.R.
A parroquia pontesa de Goente pechou con éxito este domingo o derradeiro dos encontros anuais destinados a promover o queixo galego, neste caso o da comarca coruñesa do Eume. O produto vai acompañado sempre nesta convocatoria do mel local, en boa competencia cos que chegan para a ocasión de moitos lugares de Galicia.
Ao final, foron 26 os postos de exposición repartidos debaixo da carpa, e non choveu, co que sol, queixo, mel castañas e fungos fixeron as ledicias dos asistentes. Os maiores, porque ademais de faceren reservas dos produtos de tempada, poideron degustar da man da catadora Salomé Beiroa e do cociñeiro André Arzúa os petiscos elaborados no recinto. Os máis pacientes, sentados e pendentes das receitas, tiveron ocasión tamén de coñecer os pasos básicos para degustaren un queixo do país, neste caso do fabricante local, Queserías del Eume.
Os pequenos aprenderon tamén a familizarse co queixo nos obradoiros preparados para eles. Como agasallo, os nenos elixiron prantas aromáticas para utilizar na cociña, ao tempo que recibiron as explicacións oportunas para coidalas no fogar.
Cinco expositores de queixo, oito de mel
Dos 26 expositores, cinco foron de queixo e oito de mel, segundo a concelleira de Promoción Económica das Pontes, Elena López. E houbo tamén artesáns e produtores da horta da zona, sen faltaren as castañas e algúns dos fungos deste outono, como cantharellus cibarius, cantharellus tubaeformis, boletus edulis ou hydnum repandum.
A asistencia a esta festa do queixo e do mel mantense en relación con algunas edicións anteriores. E aínda que se invitou a máis fabricantes de queixos e expositores en xeral, a coincidencia doutras feiras nestes días en Galicia -entre elas o San Froilán lucense- fixo que rematasen por non acudir, segundo Elena López.
En todo caso, insistíu a concelleira na importancia de que haxa unha representación crecente dos produtos que anualmente se promocionan, co que recalcou que, cando queiran vir, teñen as portas abertas".
O público atende a unhas instrucións mínimas para catar un queixo; logo veñen as receitas e os petiscos variados
Lácteos de Moeche, Quexería Daniberto e Lácteos Bretón, tres dos asistentes a feira de Goente
Queserías del Eume, produtor local e un dos organizadores do encontro anual
Para os amantes dos fungos e das castañas a feira foi unha boa ocasión tamén para mercar
Fuente RSS
