​
Queixo: 'San Simón da Costa',
de ‘Queixería Daniberto’
Procedencia: Rúa Pude, 2 / San
​Simón da Costa / Vilalba (Lugo)
DOP: San Simón da Costa
Tipo de leite: de vaca, pasteurizado
​Tamaños dispoñibles:
-San Simón da Costa 
(1 quilogramo, aprox.)
-Bufón (0,800 quilogramos aprox.)
-San Simón Reserva 
​(1 quilogramo aprox.)


​​​

​Tipo de queixo//Descrición: Queixo curado durante un período de 45 días para o formato San Simón da Costa grande e de 30 días para o caso do Bufón. Afúmase con labras de vidueiro, o que lle da o seu característico e diferenciado sabor e que, segundo destaca o productor, convérteo nun produto exclusivo, que o diferencia de todos os queixos galegos e practicamente de todos os queixos do mundo.
 
Suxestións de consumo e conservación: Como todos os queixos da Denominación de Orixe Protexida (DOP) San Simón da Costa, é un queixo ideal para as sobremesas e para degustar a calquer hora do día. E  tamén para traballar na cociña, sen máis límite, case, que o que veña marcado polas habilidades  e bo facer dos cociñeiros, que non dubidan en aproveitalo para elaborar exclusivas salsas, incluída a propia cuberta do queixo, perfectamente comestible. Marida á perfección con viños galegos tintos e brancos, así como cunha boa cervexa.

Queixería Daniberto pon especial énfase na produción, coidando valores de antano e tentando ser fiel á tradición. Busca tamén ampliar mercado e chegar a padales distintos, polo que nos últimos anos sacou novos produtos. Pero o San Simón e o Queixo de Tetilla seguen a ser os seus reclamos máis fortes cara a un consumidor esixente. Estes dous queixos están inscritos, respectivamente, nas DOP do mesmo nome.

Queixo: 'Graxo curado' de Queixería do Crisanto

Procedencia:  Moreda-Lanzós
 Vilalba (Lugo)

Tipo de leite: Leite pasteurizado de vaca
​
​Tamaños dispoñibles: Redondo,
dun quilogramo, e en formato tamén
de 3 quilogramos.



​Tipo de queixo//Descrición: Trátase dun queixo que polo seu aspecto exterior puidera parecer que procede de Castela. Pero faise en Vilalba, só con leite de vaca, o que lle da un sabor un pouco máis suave, algo que recalca o productor que busca moitas veces o comprador, un queixo tipo Castela pero non tan forte. 

Con esa idea se fixo. Con esa idea e coa posibilidade de engadir unha proposta nova aos tradicionais queixos de San Simón da Costa que fabrica Don Crisanto, xunto co seu patelo ou queixo de país e co seu requeixo.

Suxestións de consumo e conservación: Calquera viño galego vai ben con este queixo, aínda que non desbota o produtor adentrarse noutras experiencias como pode ser a de tomalo con sidra. Recoméndase como entrante ou como sobremesa e quedan por explorar as súas posibilidades na cociña. Xunto con todos os datos de interés que se inclúen na etiqueta deste queixo está o de que se conserve refrixerado, para manter as condicións óptimas para o consumo.