Queixo: 'Tetilla', da Cooperativa de
Produtores Campo Capela

Procedencia: Os Calzados s/n 
A Capela (A Coruña)

Tipo de leite: crú de vaca.

Peso: Un quilogramo, apróx.






​

Tipo de queixo // descrición: Queixo tenro, de pasta branda, graxo, de maduración curta (o normal é que saia o ´tetilla' a partir dos dez días, pero o habitual tamén é comelo a partir dos vinte días).

Suxestións de consumo e conservación: Un queixo tan versátil como o `tetilla' pode aportar múltiples colaboracións na cociña, para preparar, acompañar e redondear pratos. E con ese inestimable valor engadido do leite crú, préstase para unha degustación sen máis acompañantes que un pan e un viño tinto do país, que tamén neste caso hai moito e moi bo onde elixir.
                                                                                                           
Pero tamén destaca para a ocasión a cooperativa produtora que con estas novas aportacións de marmeladas -que se están a comercializar, con moita innovación e éxito crecente e que non son doces- este queixo acada maridaxes excelentes. Non se poden deixar de probar. Falamos, por exemplo, de marmeladas de pemento ou de tomate -por poñer dous exemplos- que contribúen a aportar experiencias novas  con este crú de vaca.
 
Como recoñecementos non lle faltan a este queixo, na propia etiqueta queda reflictido un dos últimos, o 'bronce' acadado na campaña 2018-2019 na World Cheese Awards, que é o escaparate mundial dos mellores queixos.
 
A conservación deste 'tetilla' non difire, obviamente, da do resto da 'tetillas´ da denominación de orixe protexida: un lugar fresco e ventilado e, no seu defecto, o frigorífico, envolto nun pano húmido para evitar que se poida resecar.

Queixo: 'Semicurado de cabra con pemento', de Touza Vella Queixería

Procedencia: Carretera OU-536,Quilómetro 44,3
Castro Caldelas (Ourense)

Tipo de leite: queixo artesanal feito con leite cru de cabra
​
Peso: entre 300 e 360 gramos por peza

​

Tipo de queixo // descrición // conservación: Queixo semicurado de pasta branda. A corteza chega a porse dura pero, por dentro, ten a mesma textura, branda, sen influír o tempo que pase. O cuallo permite que non endureza. Como non se trata de queixos prensados, senón que se fan polo seu propio peso, manteñen esa textura.
 
Trátase dun queixo que o fabricante pode por á venda nun prazo de 15 días e sinala que hai que mantelo na cámara durante un mes. A partir de aí, é cando comeza a coller codia e a saírlle o mofo, polo que se pode deixar fóra, a temperatura baixa. Ao mercalo, pódese conservar na neveira, mellor nun recipiente hermético de plástico que nun pano, xa que o seu forte cheiro podería terminar por mandar en todo o que se atope no interior do frigorífico. En calquera caso, este queixo de cabra de leite cru produce un mofo que resalta o fabricante que é "perfectamente comestible", por que é pemento só o que ten.

Suxestións de consumo: O queixo de cabra con pemento, polas súas característas, préstase para o seu consumo en calquera momento, polo que un bo viño convértese nun tándem ideal, máxime se falamos dun caldo tinto galego; aínda que se fóse un branco, godello, ribeiro ou rías baixas, ten que ter moitos tamén moitos adeptos, xa que, en padales, bo gusto e oferta non facemos máis que mellorar.
 
Este fabricante fai, entre outros, un queixo con malta, para o que o mellor acompañante é a cervexa e do que non tardaremos en falar.

 
​Queixo: 'Tetilla', de Lácteos Anzuxao

Procedencia: Madriñán, 2  
Lalín (Pontevedra)
​
Tipo de leite: de vaca, pasteurizado
​
​Tamaños dispoñibles: A peza deste queixo ten arredor dun quilogramo





Tipo de queixo//Descrición: Queixo de pasta cremosa e uniforme, con poucos ollos e sabor lácteo. Cortiza fina e elástica. Este 'Tetilla', en liña co resto dos productos da queixería e tamén coas demandas dos seus consumidores, ten algo menos de sal que a maioría dos queixos á venda no mercado.

 Suxestións de consumo e conservación: A degustación deste queixo é óptima nunha franxa de temperatura entre os 16 e os 18 grados, polo que, como no caso do resto dos queixos, debe sacarse do frigorífico -se é o caso-  o tempo suficiente para que non estea frío en boca. Isto permitirá apreciar todas as súas características organolépticas. Sen olvidar o seu tradicional papel como queixo de sobremesa, o 'Tetilla' ten un gran potencial culinario, desde os aperitivos ao seu papel nos fogóns; deste gratinados a recheos de produtos tan diversos como pementos, canelóns, cogomelos ou verduras. Pero as súas posibilidades parecen non ter máis límite que o do propio cociñeiro ou cociñeira para entrar en propostas como afumados, herbas aromáticas, tortas, purés, pasteliños, pinchos…

Tal e como recomenda a propia Denominación de Orixe Protexida (DOP) 'Queixo Tetilla', os mellores lugares para a conservación deste produto son as adegas ou subterráneos frescos e ventilados. Pero como isto  non é o habitual, o lugar máis adecuado é o frigorífico. A temperatura, na neveira, debe oscilar entre os 5 e os 8 graos centígrados, polo que a parte baixa é a mellor para gardar o queixo. 

O queixo 'Tetilla' de Lácteos Anzuxao conta con diversos recoñecementos e premios e desde finais de 2016 este produto dispón do certificado de Galicia Calidade, un selo impulsado pola Xunta de Galicia que destaca a queixería lalinense que lle aporta recoñecemento e un plus de prestixo cara ao consumidor que se comproba alí onde chega o produto.