QdeS
Xa se están desenvolvendo as xornadas formativas complementarias sobre a análise sensorial dos queixos galegos con Denominación de Orixe Protexida (DOP), impartidas pola experta catadora Salomé Beiroa. son catro xornadas formativas dirixidas  a aqueles que  teñen coñecementos na materia. As prazas están cubertas, pero tamén se celebran seis xornadas máis de iniciación para as que aínda se admiten inscricións. A formación é -en todos os casos- gratuíta, e está dirixida ao sector e industria agrogandeiros.
 
A primeira das sesións complementarias celebrouse  xa no Centro de Formación e Expermientación Agroforestal (CFEA), en Sergude, Boqueixón ( A Coruña). A segunda desenvolveuse os  días 6 e 7 de setembro en Vilalba (Lugo). O  13 e 15 deste mes repítese a actividade  en Lamas de Abade (Santiago/A Coruña)  e os días 20 e 22 en Lalín (Pontevedra). O horario é, en todos os casos, de cinco da tarde a nove do serán.
 
Estas catro sesións están dirixidas a aquelas persoas que ou ben cursaron o ano anterior a formación inicial, ou ben xa posúen coñecementos previamente ao curso.
 
O obxectivo desta actividade formativa -que conta con dez sesións (seis de iniciación e catro complementarias)- é  “achegar a industria e o sector agroalimentario a uns produtos excepcionais” como son os queixos galegos con DOP (o queixo San Simón da Costa, o queixo do Cebreiro, o queixo Arzúa-Ulloa e queixo Tetilla).  Son as catro Denominacións coas que conta Galicia en materia queixeira.
 
Prazas libres na formación de iniciación
 
Calquera persoa vinculada ao sector pode inscribirse gratuitamente nas actividades e non só quen se dedica directamente á fabricación de queixos, senón tamén aquelas produtoras e produtores lácteos, comercializadores e outros.
 
Resalta Salomé Beiroa que “malia que o leite chega ás queixerías desde o sector primario, os queixos galegos aínda precisan ser moito máis coñecidos entre as persoas que todos os días abastecen del á industria”.
 
Como xa queda dito, para as catro primeiras xornadas -as de formación complementaria- o prazo está pechado-. Pero queda algunha praza para as de iniciación, para o que é preciso escribir a formacion.queixos@beiroa.org ou ben cubrir o seguinte formulario en liña (https://i.gal/formacionqueixos2021)
 
Nas sesións formativas abórdanse cuestións como a degustación do produto, saber apreciar as súas características ou como dar valor aos parámetros que garanten a súa calidade. Do labor encárgase Salomé Beiroa,  que conta cunha longa traxectoria como catadora destes produtos no Panel de Cata da Xunta de Galicia desde hai 15 anos.
 
Os colaboradores
 
A formación en análise sensorial dos queixos galegos con DOP conta co financiamento de fondos europeos (Feader), da Axencia Galega da Calidade Alimentaria (Agacal), así como coa colaboración dos Consellos Reguladores do Queixo do Cebreiro, Queixo Tetilla, Queixo Arzúa-Ulloa e Queixo San Simón da Costa, entre outras entidades e institucións.
 

​
QdeG
​
A Denominación de Orixe Protexida (DOP) Arzúa-Ulloa mantén a consolidación do crecemento da produción dos seus queixos, cun 2,10 por cento máis en 2020 en relación co ano anterior, no que mandou na economía un desconcerto xeral  que en maior ou menor medida chega ata hoxe. Non obstante, "a situación está ben; non hai queixa", segundo o balance resumido do presidente do Consello Regulador da DOP, Xosé Luis Carrera Valín, quen recorda que durante a última década "crecemos un pouco. Estivemos estabilizados un anos pero, precisamente, o ano pasado, que foi o ano da pandemia, medramos".

Xosé Luis Carrera apunta que os produtos de proximidade, como é o caso do Arzúa-Ulloa - chámalle  de proximidade porque este queixo prodúcese en Galicia, onde se vende o  80 por cento do total-, foi ben acollido nunhas circunstancias como as da pandemia. E  aínda que se baixou algo na hostalería, o groso das vendas estivo na relación das familias coas tendas, mercados e supermercados, e "aí,  aumentamos"recalca.

Sobre como vai 2021, sinala que  "está máis tranquilo" e que , non se creceu aínda. Con todo, recoñece que é difícil poder facer balance agora, á metade de ano, no que   "imos por o momento un pouquiño por debaixo do 2020". Haberá que esperar a que remate o 2021. "Pero estamos ben".

O valor económico estimado da produción certificada en 2020 supón un total de 22,65 millóns de euros, fronte aos 21,11 millóns do ano 2019, segundo os datos da Consellería do Medio Rural. A produción pasou dos 3,6 millóns de quilogramos (3.606.707), case 75.000 quilogramos máis que en 2019 (3.523.475),con arredor do 2,1 por cento de crecemento.

Datos da década

Desde 2010, o Arzúa-Ulloa pasou de 3,2 millóns de quilogramos producidos a eses algo máis de 3,6 millóns en 2020. As estimacións reflicten tamén unha valoración económica de vendas crecente,que no período pasou dos 19,22 millóns de euros (2010) aos 22,65 millóns (2020). Neste tempo, as queixerías pasaron de 21 a 19.

Hai que dicir, sen embargo, que en 2011 había 24 fábricas de queixo en produción, que se mantiveron en 2012, para baixar ata as 23 en 2013. A partires desta última referencia, o dente de serra tivo a cota máis elevada nas 22 queixerías de 2015, para ir baixando logo ás 19 do último exercicio pechado. Aínda así, matiza Xosé Luis Carrera que algunha hai que non está producindo neste momento, pero débese a un cambio de titularidade.

En 2020, segundo os datos da DOP Arzúa-Ulloa e da Consellería do Medio Rural, as unidades certificadas pola denominación supuxeron un incremento de máis dun 6,3 por cento sobre o exercicio anterior, con 3.871.000 queixos contraetiquetados.

Se hai un crecemento global na produción do 2,10 por cento e o  número de pezas supón un 6,3 por cento máis, explica o Consello Regulador da DOP que se debe a que funcionou a tendencia das crisis económicas: decantarse pola compra de pezas de menor tamaño e, polo tanto, a un prezo máis acaído.

Pero é significativo que este queixo manteña os seus incrementos ano a ano. Unha razón de peso é, sen dúbida,  que se trata dun producto  de moita calidade e a un bo prezo. Non en balde é a segunda denominación de orixe protexida española que máis vende, despois doutro clásico do  mercado español como é a  DOP Queixo Manchego.
​