A XXIX Festa do Requeixo da Capela pechou edición con 7.000 terrinas vendidas, éxito de asistentes un ano máis e cumpriu a aspiración de aglutinar nun único recinto todo o feiral. O tempo, caloroso ata entrada a tarde,  tornou en forte treboada e choiva abundante a partir das cinco, o que restou un bo número de visitantes e vendas. Aínda así, calculan os organizadores que acudiron unhas 4.000 persoas tan só pola mañá. O requeixo local volveu estar presente na sobremesa, nesta ocasión tamén como base na elaboración dun acertado xeado e na preparación dunha hamburguesa recomendada para gourmets.   

Ademais dos queixos locais, que xunto co requeixo presenta cada ano a Cooperativa Campo Capela, sempre acoden a este encontro fabricantes que buscan achegar os seus queixos a novos mercados, como foi o caso nesta ocasión de 'Touza Vella', unha queixería do concello ourensán de Castro Caldelas que presenta unha tan variada como interesante oferta de produtos elaborados a partir do leite de cabra,  que se poden encontrar en tiendas especializadas de toda Galicia.  

´Campo Capela' que elabora lácteos artesáns de leite cru de vaca, oferta múltiples productos ademais do requeixo e da crema de requeixo, como son o queixo tetilla, o queixo con chourizo celta, o queixo con herbas aromáticas, o queixo con aceite e pemento picante ou a torta de requeixo, sen olvidar outros produtos como a manteiga, a nata fresca, o licor de queixo, o soro natural, o mel que acompaña ao requeixo ou as marmeladas artesás.

E non falta un queixo tenro que non fai máis que aumentar en vendas e en premios (xa van tres) que ten no café e na canela dous dos seus segredos: o queixo ‘mouro', segundo lembrou no propio campo da festa a xerente da Coperativa Campo Capela, Ana Vence, quen non dubidou en resaltar a nova proposta do 'Congreso do Bo Comer' que se celebrou o pasado venres -co que se pode falar xa de tres días adicados á festa- con cinco relatores en diversos temas que tiveron co público asistente unha gran interrelación. Ou sexa, que haberá nova edición en 2018.

A falta de coñecer os datos do que poden supoñer os contactos nos postos de maquinaria -que conlevan, en todo caso, vendas a posteriori- as pequenas operacións de venta directa deste feiral  estima Ana Vence que se poden situar  arredor dos 40.000 euros.  Na venda de queixos 'Campo Capela' avanza a súa xerente unha cifra estimativa na xornada dominical duns 7.000 euros.

Pregón de Francisco Sineiro

O pregoeiro deste ano foi  o profesor titular da Universidade de Santiago, enxeñeiro agrícola e exconselleiro de Agricultura Francisco Sineiro, quen lembrou o requeixo como “un produto natural e saudable que leva o mellor destas terras do Eume".  Dixo que o leite, o requeixo e o  queixo comparten co pan e co viño un grupo de alimentos que foron básicos para a alimentación de moita xente en moitas sociedades, entre elas a nosa.
​
Sinalou tamén que o sector lácteo é básico en moitas economías das comarcas  de Galicia. Insistíu que é o fundamental agora e que o siga sendo cara ao futuro, superando problemas como os prezos que reciben os produtores, que non son negociados e que "aínda non están á altura do que logo pagamos os consumidores".  Reclamou así mesmo máis terras para uns agricultores que poidan ser menos dependentes da compra de alimento e falou da necesidade dunha industria para un país que é o primeiro produtor pero que "ten un papel marxinal na industria láctea".

Xeado de requeixo, hamburguesa con queixo fundido
​
Entre as múltiples propostas desta festa, estivo tamén o domingo na Capela a do chef Antonio Díaz, do resturante Andarubel, instalado en pleno corazón das Fragas do Eume. O cociñeiro traballa con "produtos locais, de proximidade" e coas  razas autóctonas -entre elas a  vaca cachena- .

​No seu restaurante, un dos produtos estrela sempre foi o queixo da comarca. Na xornada dominical ofreceulle Antonio Díaz aos visitantes  á festa  os recoñecidos 'bicos de xeado', de Granxa Cancelo- un xeado de requeixo que non para de gañar adeptos- ou as non menos interesantes hamburguesas elaboradas con carne de vaca  cachena  e un bo taco de queixo cremoso fundido,  nesta ocasión  da Capela.

Os axustes finais fan que festas como a do Requeixo da Capela -que entra na súa XXIX edición- reteñan ata uns días antes o cartel anunciador e o groso do programa de actos,   pero unha cousa vén sendo segura ano tras ano, que o encontro se celebra cada último domingo do mes de agosto, que  a asistencia se segue a contar por milleiros de visitantes e que son moitos os  amantes do queixo os que se achegan ata este municipio coruñés para degustar no lugar un produto xenuíno, elaborado con leite de vaca cru, que sabe ao requeixo de sempre destas terras.  

O rexedor municipal da Capela, Manuel Meizoso, que leva camiño dos seis anos na alcaldía e, polo tanto, organizando xunto coa Cooperativa de produtores 'Campo Capela' a Festa do Requeixo, planea seguir o labor dos seus antecesores, mantendo o encontro, pero buscando darlle "un impulso máis".
Na súa opinión, proxectos como o da cooperativa "están na boa dirección",  polo que  aposta por que a fábrica de queixo e de requeixo se vexa recompensada con novos logros, con máis produtos, vendas e empregos.  

Está tamén  na mente dos impulsores deste encontro anual establecer un concurso entre os máis pequenos para que sexan eles os encargados de preparar o cartel anunciador do feiral, co que se contribuirá a involucralos  na festa.

O obxectivo neste último ano foi darlle un impulso  ao feiral, intentando congregar a todos os visitantes nunha soa área, porque o espazo estaba a quedar cada vez máis pequeno e "non reflectía a asistencia real no campo da festa", sinala o alcalde, que xa na Festa do Requeixo de 2016 insistía  na conveniencia de congregar toda a actividade nun espazo único.  Este ano cabe a posibilidade de que poida presentarse xa a festa no seu conxunto, tal e como é en realidade, posto que o recinto utilizado ata agora permitía meter uns 30  postos, pero fóra quedaban uns 50. Ademais da maquinaria, que son outros nove ou dez postos máis.
​
Recursos
 No plano económico, para impulsar o proxecto, están os 12.000 euros que aportou na edición de 2016 o propio concello, e os 6.000 da Deputación Provincial. Logo está a fundamental colaboración do vecindario, que aporta gratuitamente os terreos para a celebración do feiral e a súa colaboración, igualmente desinteresada, para a montaxe de todo o proxecto. "Gracias aos veciños se pode montar isto", destaca o rexedor municipal.

Un ano con outro, polo recinto da festa, na parroquia das Neves, pasan, en números redondos, uns 10.000 visitantes, fronte a unha poboación que, segundo os datos estatísticos de 2010 , ascendía a 1.399 en todo o municipio, cunha baixada  a agosto de 2016 a 1.334. A razón, segundo Manuel Meizoso hai que buscala básicamente na caída demográfica, con máis decesos que nacementos.  A media é a unha  perda de dez a 12 persoas anuais.
​
O sector primario, base da actividade do municipio, combinouse durante moitos anos co sector naval e con Endesa (As Pontes). Pero a xente nova non está apostando polo agro, segundo o alcalde, porque traballando “as 24 horas do día” gaña menos que o que ofrecen algunhas empresas, con setecentos ou oitocentos euros mensuais. O reto, polo tanto, debe estar en recuperar para a actividade local a esta xente, con empregos de calidade.