A.S.Rocha

Este martes entregáronse en Santiago os premios da XXVIII Cata dos Queixos de Galicia, catro dos cales -na modalidade de ouro- corresponderon a queixerías adscritas á Denominación de Orixe Protexida (DOP) Arzúa-Ulloa, que acaparou tamén todos os tres galardóns -ouro, prata e bronce- que estaban en xogo no apartado de produción ecolóxica. Outros tres 'ouros' foron para o Queixo Cebreiro, mentres que dous recibiunos o Queixo San Simón da Costa. Tamén se premiaron os mellores meles de Galicia, que celebrou a súa XXIV edición.

En concreto, na modalidade de Queixo Tetilla o 'ouro' foi para a Queixería Queinaga, que quedou tamén en primeira posición co seu queixo Arzúa-Ulloa. Nesta última dernominación, Queixería Barral recibíu idéntico galardón polo seu Arzúa-Ulloa curado.

A placa de ouro na denominación Cebreiro recibiuna Queixos Castelo de  Brañas, mentres que a Santo André concedéuselle outra polo seu queixo curado. 

No San Simón da Costa, Prestes recibiu o 'ouro', ao igual que Catadoiro, neste caso polo seu queixo curado.

Na modalidade de Artesanía Alimentaria, Queixos do Castelo de Brañas recibiu o máximo galardón, mentres que Arqueixal tivo o mesmo recoñecemento cun produto fabricado dentro  da Agricultura Ecolóxica.

Meles

En meles, os 'ouros' foron no apartado monofloral de breixo para De Liñares; monofloral de castiñeiro, para Manuel Sande; e mel monofloral de Silva, para Mieles JS. En meles monoflorais houbo un 'ouro' para Mel de Moreiras, outro para Abella Meiga (mel de bosque) e un máis  para O Poder das Flores (artesanía alimentaria).

Plan Saborea Calidade Diferenciada de Galicia

A entrega de premios presidiuna a conselleira do Medio Rural, María José Gómez, quen adiantou que o seu departamento destinará o próximo ano 10 millóns de euros ao Plan Saborea Calidade Diferenciada de Galicia, dous millóns máis que en 2025, "co que se seguirán impulsando este tiipo de producións", dixo. 

A edición de 2025  contou coa participación de 31 queixerías  -que aportaron 66 mostras- e de 28 industrias do mel -neste caso con 58-.

Nas catas estiveron representados productos amparados polos distintivos das denominacións de orige protexida San Simón da Costa, Arzúa-Ulloa, Queixo Tetilla e Cebreiro; da Indicación Xeográfica Protexida Mel de Galicia; de Agricultura Ecolóxica e de Artesanía Alimentaria.  -

QdeG

Após participar en feiras, exposicións e concursos nacionais e internacionais, os queixos galegos van rivalizar agora, camiño da fin de ano, por quedaren entre os mellores do país. Son, en total, 31 fabricantes, que aportan a exame un total de 66 mostras. Os catadores afinan nestas horas as súas habilidades no Pazo de Quián, en Sergude, (Boqueixón/A Coruña) un bo escenario no que ten a sede a a Denominación de Orixe Protexida (DOP) Queixo Tetilla.

A conselleira do Medio Rural, María José Gómez, asistiu esta mañá ao pazo, onde se están a avaliar tamén as mostras da nova edición dos Meles de Galicia. Alí destacou o reforzo pola promoción dos queixos galegos de calidade diferenciada a través dunha nova edición do certame.

As propostas repártense do seguinte xeito: DOP Queixo Tetilla (16 mostras); DOP Arzúa-Ulloa e Arzúa-Ulloa Curado (19 mostras); DOP San Simón da Costa e San Simón Curado (13 mostras); DOP Cebreiro e Cebreiro Curado nas categorías Cebreiro e Cebreiro Curado (tres mostras entrambas); Queixos Ecolóxicos (seis mostras); e Queixos Artesáns de Galicia (nove mostras).

O panel da cata está integrado por 12 expertos, encargados de analizar totalmente ás cegas e de forma minuciosa estas mostras, para seleccionaren as marcas gañadoras.

Os datos de 2024

Só as catro denominacións de orixe protexidas suman máis de medio cento de queixerías en toda Galicia, que producen arredor de sete millóns de quilos de queixo ao ano e que representan un valor económico estimado de máis de 58 millóns de euros (datos de 2024).

Tendo presentes estes datos, a conselleira do Medio Rural cualificou a produción queixeira como un  sector de referencia no rural galego, "que dá valor engadido ao noso leite e que contribúe de xeito moi destacado a crear emprego e riqueza, así como a fixar poboación”, dixo. 

 
QdeG
​Unha ducia de postos de queixo -entre fabricantes e distribuidores de varias marcas- déronse cita este sábado na 1ª Feira do Queixo de Sillobre (Fene/A Coruña), nunha xornada na que ameazou a chuvia, o que puido ser un condicionante para algúns posibles visitantes. Destacaron os queixeiros que acudiron a invitación para expoñer os seus produtos que o fixeron guiados polo labor de colaborar e darlle pulo ao feiral neste primer encontro. Tamén valoraron positivamente as vendas e a decisión do público para mercar. Os organizadores cifraron en máis de mil os visitantes.

A variedade de produto galego quedou patente, con postos ofertando  queixos das catro denominacións de orixe protexida galegas, cunha representación ampla dos queixos ecolóxicos. Acudíu unha queixería portuguesa e un distribuidor lucense puxo en circulación tamén queixos de Zamora. Non faltaron postos de venta de mel e outros produtos de alimentación.

O público tivo a oportunidade de seguir a preparación de varios pratos en directo, que logo  degustaron camiño de corenta persoas. Deste labor encargouse José Loureiro, profesor da Escola de Cociña Icook de Fene, que fixo un rissoto con setas 'a galega' con queixo fresco de Sillobre e Albariño e ñoquis de grelos recheos co requeixo local.

A feira, organizada conxuntamente por Gandaría Sillobre e pola Sociedade Cultural, Recreativa e Deportiva Agariño, contou coa colabaración do Concello local e de Radio Fene.

Os protagonistas

Ademais de Gandaría Sillobre, que vendeu todas as existencias de queixo freso e  requeixo, puxeron posto no adro da igrexa parroquial de Santa Marina: Queixería Santo André (Castroverde/Lugo); Lácteos Bretón (Irixoa/A Coruña); Queixería Bisqato (Guitiriz/Lugo); Cooperativa Campo Capela (A Capela/A Coruña); Aromas 4U (Ponte da Lima/Portugal); Gaia Gourmets (Vilar de Santos/Ourense); Queixería Dona Cobina (Agolada/Pontevedra); Lácteos de Moeche (Moeche/A Coruña); e Queixería Pousada (Portomarín/Lugo); así como Distega, que distribuíu queixos da provincia Zamora.

 A.S.Rocha

O vindeiro 25 de outubro nace unha nova feira do queixo en Galicia, na parroquia de Sillobre (no concello de Fene/A Coruña), combinando o impulso da Sociedade Cultural, Recreativa e Deportiva (SCRD) Agarimo e o diario traballo produtivo e comercial da Gandaría Sillobre. Deste xeito, no que vai de ano, son dous os novos proxectos incorporados á exaltación dos queixos galegos. O primeiro foi a finais de abril, coa celebración da Feira de Queixos de Pontedeume (Merca Queixo).

 O proxecto de Sillobre parte das potencialidades locais, cunha fábrica que elabora queixo fresco de leite cru e un requeixo que lle quitan das mans, xunto co respaldo dunha sociedade cultural -cun arraigo moi forte- que está disposta a turrar tamén deste apartado económico para a promocionar o produto.

"Imos ser pioneiros, temos moito que aprender e pode que haxa fallos, pero a ilusión témola toda", sinala Eva María Fraga Pérez, presidenta da Sociedade Agarimo, que confía en que a feira teña continuidade nos próximos anos.

En Fene hai varias queixerías máis, ás que se vai convidar, e espérase que  se acheguen outras de Galicia. Tamén se espera que acudan vendedores de mel e que algún cociñeiro ou cociñeira da zona faga as delicias dos asistentes con petiscos elaborados diante do público con materias primas locais.
​
O encontro celebrarase no entorno do adro da igrexa -espectacular, adianta Eva Fraga- e no caso de que chovese o feira trasladaríase ao amplo local da Sociedade Agarimo.

QdG

A parroquia pontesa de Goente celebrou este domingo a súa décimo quinta Feira do Queixo e do Mel, que segue a manter un formato marcadamente local e na que se se volveron promocionar con éxito  os dous produtos, así coma outros procedentes do agro e da artesanía galega. Axudou o sol e a maior asistencia de público concentrouse fundamentalmente entre o mediodía e a hora de xantar.

A fórmula, segundo lembrou a conselleira de Turismo e Promoción Económica do concello coruñés das Pontes, Elena López, é seguir poñendo en valor tanto as propostas que saen da fábrica local de Queserías del Eume como da Casa do Mel de Goente, unha asociación formada por preto de cincocentos apicultores de todo o país, pero sobre todo da provincia.

Foron seis as queixerías de distintos puntos de Galicia as que asistiron. Ademais de Queserías del Eume, puxeron posto de venda Don Gabino (Vilalba/Lugo), Lácteos Bretón (Irixoa/A Coruña), Queixería Bisqato (Guitiriz/Lugo), Lácteos de Moeche ( Moeche/A Coruña) e Gandaría Sillobre (Fene/A Coruña), de recente creación e que ofreceu o seu requeixo e queixo fresco, ámbolos dous de leite cru.

Ao longo da xornada desenvolvéronse obradoiros infantís, unha degustación gratuita de tapas elaboradas con produtos locais e unha actuación teatral a cargo da compañía O Cubo.

Nova feira do queixo, en Sillobre

A Feira do Queixo do Eume e Mel de Goente servíu de 'altofalante' para promocionar a que dentro dunhas semanas será a l Feira do Queixo de Sillobre (Fene/A Coruña), organizada, precisamente, por Gandaría Sillobre e a Sociedade Cultural, Recreativa e Deportiva Agarimo.
​
Terá lugar o vindeiro 25 de outubro e abrirá as súas portas ás dez da mañá, para rematar ás seis da tarde.

G. Soto Lourido

A choiva xogou ao longo da xornada dominical coas expectativas dos organizadores da XXXV Festa do Requeixo da Capela. Contra a unha da tarde, caeu auga con intensidade durante uns minutos, pero o pregoeiro desta edición non tivo dificultade para chegar ao palco da música, aínda que boa parte da audiciencia fíxose forte nos amplos acubillos dos puntos de venda. O escuro nubeiro inicial deu paso a un sol pouco crible. Pola tarde choveu algo e por momentos. O panorama non impediu  que á hora de facer balance se volvese rexistar un ano máis unha venda de preto de 3.000 terrinas de requeixo.

Na súa intervención, Xan Rodríguez Silvar, biólogo e delegado da Sociedade Galega de Historia Natural de Ferrol, expresou a súa ledicia de vir ao Concello coruñés da Capela para lembrar todo o traballo e todo o esforzo de xeracións "para conservaren, con cariño, os valores verdadeiros dunha forma sostible e dar vías de futuro".

Sobre o manxar local, do que dixo que para el é "un dos seus produtos favoritos", sinalou que lle recomenda a todas as súas amizades "que busquen este requeixo". No seu maxín estaba hoxe mercar camiño da media ducia de terrinas, "por que xa teño un destinatario", bromeou.

Intercesión do Mago Antón?

Non faltou nesta festa unha ampla representación de queixeiros, artesáns e expositores, con diversas actuacións musicais e un obradoiro infantil sobre a elaboración de sobremesas con requeixo.    

E como choveu en moitos puntos de España - no caso da Capela, e en clave retranqueira-, non se sabe moi ben o alcance das pretendidas intervencións  no recinto feiral do Mago Antón para controlar as precipitacións. Ben e certo que os asistentes saíron encantados do espectáculo, pero entre a maxia e o milagre…

 Antonio S. Rocha

Despois das análises e das teorías do primeiro día do Cheese Market Tour en Santiago, e de falar da diversidade, calidade e tradición do queixo galego, con cinco mesas profesionales de debate - nas que se incidiu na comercialización do queixo galego, na innovación, na normativa sanitaria, no desenvolvemento rural ou no potencial turístico  do produto- chegou o tempo da práctica.

O venres 18 de xullo, os afeccionados aos queixos galegos tiveron a aportunidade de participaren en catas guiadas, tanto dos incluídos como dos excluídos das denominacións de orixe protexida (DOP). E o venres 19 de xullo, 12 fabricantes galegos e seis produtores agroalimentarios expuxeron os seus produtos. Así que os santiagueses puideron degustar e comprar algúns dos mellores queixos que se fan no país.

O marco non foi moi  habitual (O mosteiro San Martiño Pinario), como non é doada tampouco a celebración desde tipo de encontros na comunidade autónoma, que moitos non lembran. A Cheease Market Tour promoveuna a Organización Interprofesional Láctea (Inlac), coa organización de QdeQueixos. A iniciativa buscou por en valor o sector lácteo galego, cunha proposta que combinou a promoción gastronómica,  a dinamización rural e as experiencias participativas para os visitantes.

Queixo e 'Camiño'

En San Martiño Pinario degustáronse queixos galegos e outros produtos locais de calidade (como pans, meles, marmelos ou bebidas). E nos amplos corredores  interiores  do mosteiro, enmarcando o claustro, intercambiaron pisadas amantes dos queixos, peregrinos, usuarios da hospedaría e visitantes dunha exposición de pintura.

Non faltou, na fusión do queixo galego coa pedra centenaria -andando estancias, ao fondo, e sen ningunha pretendida relación na programación- unha feliz exposición pictórica de Lola Doporto, cuxos lenzos  se proxectan coa factura do 'Camiño'. En moitos  dos cadros, nos que están omniprentes os 'ollos grandes' e sempre sorprendentes ou sorprendidos dalgúns persoeiros da idade media galega, navega o botafumeiro, o afiador, unhas pandereteiras, músicos, o mestre Mateo, Santiago Apóstolo ou o propio arcebispo Diego Xelmírez, sen olvidar un gaiteiro (Faustino) a gaiteira de Bendilló (Felisa) ou a unha polbeira do Carballiño á que máis dun lle vai buscar parecidos.

E, se acaso, para os que quixeran saber máis, está o misterio do cadro  'Muller con paxaro', na exposión -que, curiosamente, tamén ama o queixo-. A exposición paga a pena. Quen guste do 'sabor' do Camiño ten ata o 17 de setembro para soprenderse e para intuír moitas cousas, como que o queixo, que é hoxe manxar exquisito, en séculos pasados matou a fame de moitos peregrinos. 

O mercado do queixo galego

Así que a exposición e a mostra de queixos coincidiron durante dous días. Os visitantes e potenciais compradores tiveron a oportunidade de probar e elixir entre as mellores pezas  de Pazo de Anzuxao (Lalín/Pontevedra); Dona Cobina (A Golada/Pontevedra); Queixería Prestes (Vilalba/Lugo); Queixería Daniberto (Vilalba/Lugo); Gandería Quintián (O Páramo/Lugo); Santo André (Castroverde/Lugo); Gaia Gourmets (Vilar de Santos/Ourense); Quesos Feijoo (Celanova/Ourense); O Rexo (Allariz/Ourense); A Tenda dos Queixos (Mesía/A Coruña); Lácteos Bretón (Irixoa/A Coruña); e Galmesán (Arzúa/A Coruña).
​
Outros produtos agroalimentarios galegos presentados foron os de Menduiña, cervexa (Cangas/Pontevedera); Nela Gourmet, marmelada (Santo Cristovo/Ourense); Terras de Boborás, mel (Boborás/Ourense); Bodegas Fernández&Macías (Cenlle/Ourense); e Rural ou Urbano (Paradela/Lugo).

Antonio S. Rocha

Remataron o pasado 19 de xullo en Santiago de Compostela dúas importantes iniciativas: unha xornada sobre 'O papel do queixo galego' (o xoves) e a exposición 'Mercado do queixo galego e produtos de cercanía' (o venres e o sábado) que incluíu a venda de queixos dunha ducia de fabricantes do país e de cinco elaboradores doutros produtos agroalimentarios autonómicos. Todo da man do Cheese Market Tour e co apoio da Organización Interprofesional Láctea (Inlac).

Na xornada falouse da distribución e venda do produto; fíxose un enfoque para uns beneficios  tanxibles en queixerías, con protocolos técnicos(de innovación, investigación, desenvolvemento e normativa de etiquetado); expúxose nunha das mesas o desenvolvemento rural e os beneficios do sector; e interviron noutra os queixeiros, os auténticos protagonistas desde encontro. Pechouse a xornada cunha mesa sobre o desafío do queixo no turismo.

Interviron múltiples invitados, desde o  CEO de Queixería Prestes, Maikel Fernández, ata Ángel López Fidalgo (socio da Casa do Queixo de Grixalba), pasando por Lidia Ferreras (delegada de Larbus), Laura Abuín (responsable de I+D da Aula de Produtos Lácteos e Tecnoloxías Alimentarias da Universidade de Santiago de Compostela), Luis Lamas e Daniel Pérez (presidentes do Consello Regulador  DOP Arzúa-Ulloa e San Simón da Costa, respectivamente), ou Nuria Arribas (directora xerente da Inlac).

A inauguración oficial  correu pola conta de David de Santiago, presidente de Qdequesos, e  de Nuria Arribas. Moderou as distintas mesas da xornada Pedro Ureña, cofundador de QdeQuesos.

O sector queixeiro en España

A directora xerente da Inlac presentou no encontro a monografía 'Los retos y desafíos del sector quesero español', coordinada por Pedro Valentín-Gamazo e Javier López Llaneza. Neste  volume, que edita Cajamar, analízanse temas como 'El mercado: importancia económica del sector quesero', 'La estructura produtiva de España', La producción: tecnología, seguridad e investigación' o 'El consumidor y el queso'.

Xa que logo, o monográfico aborda os temas claves sobre o queixo español, que tivo unha produción aproximada en 2023 de 530.000 toneladas (segundo Eurostat), co que a actividade consolídase como unha das máis dinámicas e en expansión dentro do sector agroalimentario español.

Liderado
​
Galicia produce o 42 por cento do leite de España e acumula o 56 por cento das explotacións lácteas.  No año 2024 a comunidade autónoma acadou máis de 3,07 millóns de toneladas de leite, segundo explicou na xornada o director xeral de Gandería, Agricultura e Industrias Agroalimentarias da Xunta de Galicia, Xosé Balseiros, quen destacou que son datos que avalan o liderado da autonomía neste ámbito. 

G.S.L.
O bo tempo axudou a despedir con ledicia a XLIII Feira Internacional Abanca Semana Verde de Galicia, que pechou edición con 112.200 visitantes, segundo un sistema de cámaras de sofware intelixente situadas nas entradas ao recinto silledense que permitíu obter cifras totais de asistencia con maior precisión. Acudiron 758 empresas e entidades de España, Portugal Italia, Cuba, Colombia, México e Estados Unidos. Nun escaparate tan amplo -con máis de 200 actividades diferentes- non volveron faltar algúns fabricantes dos mellores queixos galegos.

Queixo Tetilla, Cebreiro, Arzúa-Ulloa ou San Simón da Costa -as catro denominacións de orixe  protexida deste produto en Galicia- tiveron representación e a boa compaña expositiva de queixos de Friol (Lugo), queixos ecolóxicos, algúns dos fabricados en Ferrolterra ou en Terras do Eume e do requeixo de moitos puntos de Galicia.
​
Así que neste abano -adubiado con outros queixos españoles como o Idiazábal, o S´Oratge de Menorca algúns máis tan afamados como o suizo  Le Gruyère ou Tête de Moine- acudiron ao recinto pontevedrés da Semana Verde de Silleda: Casa Zolle (Friol/Lugo); Dona Cobina-Cobideza ( A Golada/Pontevedra); Queniaga (Curtis/A Coruña); Barral (Arzúa/A Coruña); Castelo de Brañas (O Cebreiro/Lugo); Brigantia (San Sadurniño/A Coruña); Bretón (Irixoa/A Coruña); Daniberto (Vilalba/Lugo); Queserías del Eume (As Pontes/A Coruña); Hoxe (Lalín/Pontevedra) ou Requeixo das Neves (As Neves/Pontevedra).

A.S. Rocha

A Feira de Queixos de Pontedeume (Merca Queixo) non puido ter mellor arranque nin acollida, cun recoñecemento xeral dos asistentes, dos vendedores, e da hostalaría. Sen apuros, e coa inestimable colaboración do tempo, cafetarías, bares e restaurantes tiveron traballo dabondo durante esta fin de semana, e os postos de venda de queixos apuraron existencias e algúns mostraron xa a súa intención de volver á segunda edición do encontro, en 2026.

Obradorios, elaboración de pratos en directo co queixo como protagonista destacado, ponencias, actuacións musicais, presentación dalgúns dos produtos, unha visita guidada polo casco histórico da vila coruñesa, charlas sobre a marca Artesanía Alimentaria de Galicia ou sobre as estratexias de recuperación de zonas abandoadas no campo galego, foron outras das actividades desenvolvidas o sábado e mailo domingo.

En total acudiron a Merca Queixo 25 queixerías da Península Ibérica, con queixos galegos, do País Vasco, de Castela-León, Estremadura ou Portugal. Unha representación de queixos importante, todos artesanais, cuxa valoración é para os organizadores do evento (O Concello de Pontedeume) "moi positiva".

A feira naceu cunha vocación de continuidade, pero "o éxito desta primeira edición empúrranos a poñerlle máis ganas, a mellorar cousas e seguir potenciando os queixos", segundo sinalou a concelleira de Turismo e Promoción Económica, Ángela Piñeiro. Recoñeceu que hai "cousiñas que mellorar, por que é a primeira edición, " pero "a experiencia, en xeral, foi positiva para a hostalaría, os queixeiros e os visitantes" insistiu.

Ángeles Piñeiro agradeceu o labor nesta edición dos patrocinadores -que foron a Deputación da Coruña e Leite Celta-, á colaboración de Unión de Comerciantes Autónomos Eumeses (UCOA) e a de Campo Capela -no seu papel de asesores-.

A falta dunha avaliación final no apartado do gasto, pódese falar dun coste de entre 40.000 e 50.000 euros.

Maridanza con viños e con vermú

Sorprendeu tamén gratamente aos visitantes poder 'casar' sabores dos queixos con viños diversos e con vermús. Cada un fixo no recinto feiral as súas maridanzas como puido, pero coa particularidade de poder degustar os seus derivados lácteos preferidos con caldos brancos e tintos de distintas denominacións españolas e con vermús. Todo de balde. Mentres Vermú Buha, rematou case coas existencias, Fernando Roca Bordello, coordinador da área norte en Félix Solís Avantis, estimou nunhas 7.000 as copas de viño repartidas o sábado e o domingo. Como queixerías de cabeceira ofrecéronse para esta proposta a galega Bisqato e a vallisoletana Cantagrullas, de Medina del Campo.