Se fixera mal tempo, habería igualmente moita xente, porque na Feira do Queixo do Cebreiro hai tradicionalmente abondosos visitantes incondicionais, de aquí e de acolá. Pero non choveu, e iso foi garante para que o encontro pechase a edición deste ano cun importante incremento de asistentes e tamén de vendas. Tanto, que se fixo complicado remexerse en rúas e postos de venta. Sempre hai onde deixar o coche, pero onde antano había un oco para aparcar para os rezagados, houbo que ir un pouco máis lonxe. Foron máis de 2.000 os queixos da zona a  venda, e moitos, moitos visitantes.

De fóra pode que houbese máis dun 60 ou 70 por cento de visitantes, que veñen a pasar ao Concello de Pedrafita do Cebreiro as vacacións, o que inclúe que haxa xente que faga parada e fonda no municipio.
Este ano non foron catro, senón cinco, as queixerías da denominación que presentaron queixos no recinto feiral de Pedrafita - Castelo de Brañas, Queixos Márqués de Cernadas, Queixos Santo André, Queixo Fonchave e Gran Despensa Abadía de Samos-. Foi a proposta samoense a que se incorporou. Os prezos dos queixos locais oscilaron entre os catro e os seis euros a peza. Pero foron outras moitas as propostas, tanto galegas como españolas e estranxeiras.

Nunha primeira valoración da  xornada feiral, a secretaria do Consello Regulador da Denominación de Orixe Queixo do Cebreiro, María Teresa Prado,  sinalou que cada edición e cada ano hai máis xente que se interesa por coñecer o queixo do Cebreiro.

O futuro do queixo curado
​
No que se refire ao produto,  a secretaria da Denominación considera que no queixo curado pode estar unha boa parte do futuro deste produto na zona, xa que, dependendo da curación, chégase a conseguir un queixo cun sabor realmente atractivo. Parece imposible que dun queixo   "moi suave, lixeiramente acedo, moi fundente" se chegue a un queixo curado, dependendo do seu grao de curación,  cun sabor como "métálico, picante" ata o punto de que pareza imposible que dun queixo tan suave, pola súa curación, se convirta nun queixo tan distinto", resalta María Teresa Prado.

Produción anual

En números redondos, o pasado ano vendéronse uns 35.000 quilogramos de queixo, que este ano, segundo se vaian coñecendo as cifras oficiais, todo indica que se van superar o tope conseguido. 

En palabras do alcalde do concello, José Luis Raposo, Pedrafita foi sempre un lugar tradicional de feiras e esta do Queixo do Cebreiro coidouse sempre con moito mimo, ata o punto de que, este ano, "se tivese que botar para atrás moita xente",  que chamou para asistir con queixos doutros lugares,  "Tivemos que decirlle  que no había sitio", dixo o rexidor municial.
​
Non deixou de lembrarJosé Luis Raposo,  que é importante que axude o tempo, aínda que houbo anos que nevou e "tivemos unha gran feira".

O Concello pontevedrés de As neves ofrece este Venres Santo 20.000 racións de requeixo e mel, o principal reclamo da súa feira anual para promocionar ambos productos e que este ano entra na súa XXVI edición. Diversas actividades máis, formativas, deportivas, musicais e, por suposto, gastronómicas, completan a oferta.

Os miles de visitantes que se darán cita durante a xornada na capitalidade do municipio poderán degustar as coñecidas ´bolas' de requeixo, desde as dez e media da mañá ata as nove e media da noite, a un prezo de 1,5 euros.

Este requeixo, tal e como lembran o Concello a Sociedade Cooperativa Condado Paradanta, é un queixo fresco elaborado con leite enteiro de vaca e fermentos lácticos, sen sal, sen conservantes e sen colorantes, e que tradicionalmente se veu consumindo como sobrepesa, endulzado con azúcar ou con mel. Antano, como sucedeu con outros derivados lácteos, a produción deste requeixo foi doméstica, ben para consumo propio ou para a venda nos mercados e feiras da zona.

Andando o tempo, do seu papel de sobremesa, o requeixo das Neves foi dando paso outros usos culinarios, como a súa utilización na elaboración de pratos salgados.

O feito de que o produto non teña sal convérteo en especialmente recomendable para aquelas persoas que teñen problemas co cloruro sódico.

O requeixo das Neves preséntase en pequeñas bolas duns 80 gramos de peso. Antano, cando se adquiría no mercado, envolvíase nunha folla de berza, pero is tempos foron cambiando e o último é o o aséptico plástico transparente.  

Festa de Interese Turístico de Galicia
​
A deste venres, recoñecida como Festa de Interese Turístico de Galicia, contará  como pregoeiro co afamado cociñeiro galego Pepe Solla, de Casa Solla, e que está entre os posuidores da ansiada 'Estrela Michelín'. Será ao mediodía.
​
A apertura da feira correrá a cargo do grupo de música e baile tradicional A Barca de Loimil. Pola tarde haberá actividades para os nenos e a intervención do grupo tradicional Ronco & Fol. Nos días previos á xornada central da feira, houbo obradoiros de cociña para nenos e maiores, a VI Ruta a BTT 'do Requesón' ou o concerto de Malveda.

O presidente do Consello Regulador da Agricultura Ecolóxica de Galicia (Craega), José Antonio Fernández, presentou hoxe en Santiago, xunto coa conselleira do Medio Rural, Ángeles Vázquez, o balance desta actividade no ano 2016,  que se resume nun incremento dun 36,5% das hectáreas certificadas, nun aumento do 25,3% das vendas e nunha facturación que chegou aos 41,7 millóns de euros. O sector do leite e dos derivados mantense como o máis destado, cos queixos como un dos principais atractivos.

Leite e derivados -queixos, iogures e manteguilla-, en efecto, están á cabeza do volume de negocio desta agricultura e incrementaron significativamente a súa facturación no período, cun 32,5% máis, co que se sitúa nos 13,2 millóns de euros.

Todo o ecolóxico ten, sen dúbida, un gran potencial de crecemento, así o sector da carne, con 6,8 millóns de euros en vendas,  medrou un 64,2%. É a segunda área de actividade en importancia, seguida das conservas de pescado, con 5,5 millóns  facturados e un avance do 32,4%.

Non desaproveitou José Antonio Fernández a presentación dos resultados do 2016 para recalcar que o fomento do consumo dos produtos ecolóxicos rematará tendo máis interés para os  galegos, porque son moi beneficiosos para a saúde e respectuosos co medio ambiente. Unha das particularidades desta actividade é que a metade do que se produce na Comunidade Autónoma véndese no exterior, tanto no resto de España como no estranxeiro.

As 'estrelas'

Os fabricantes de queixos acollidos  a día de hoxe no Consello Regulador da Agricultura Ecolóxica son Innolact S.L. (Castro de Rei/Lugo), que elabora queixo crema; Xosé Luis Carreira Valín (Palas de Rei/Lugo)  que prepara queixo Arzúa-Ulloa e iogurt natural; Avega-Cobideza S.A. (Agolada/Pontevedra), que fabrica queixo de barra, queixo redondo e queixo mini; Ganadería Casa Ángel S.C. (A Pastoriza/Lugo), que prepara queixo Tetilla, queixo patela, queixo freso, queixo San Simón e requeixo; Paolo Pietrunti/importador (Vigo/Pontevedra), que ofrece queixo Parmigiano Reggiano; e Antonio Carral Sucasas (Lalín/Pontevedra), que elabora queixo tipo país.

Obxectivo, seguir medrando

Segundo puxo de relevo na presentación dos resultados de 2016 a conselleira do Medio Rural, o obxectivo é impulsar un plan estratéxico para este eido produtivo, que rexistra un incremento sostido da superficie inscrita e dos operadores nos últimos anos.
Para iso, Ángeles Vázquez anunciou que a Xunta destinará 4,3 millós de euros para o plan de fixación da poboación no rural e para ampliar en 8.000 hectáreas a superficie adicada á producción ecolóxica.

A XXIII Festa do Queixo San Simón da Costa pechou este fin de semana edición cun resultados satisfactorios para os seus organizadores. O sábado rexistrouse un "éxito total", en palabras do presidente do Consello Regulador da Denominación de Orixe Protexida, Daniel Pérez, co importante reclamo de varios cociñeiros, mentres que o bo tempo axudou tamén a que durante a xornada dominical acudise á capitalidade do municipio lucense de Vilalba moita xente, ata o punto de que posiblemente, se rexistrase nesta edición un novo récord de visitantes. Os datos definitivos coñeceranse esta semana.

Daniel Pérez siñalou que cada nova edición participa no encontro xente máis profesionalizada do sector da hostalería e expresou o seu agradecemento a todos os cociñeiros que usan o queixo San Simón da Costa na súa cociña. Tivo, ademais,  un especial recoñecemento nesta ocasión para un dos máis recoñecidos restauradores galegos, Pepe Solla.

O sábado, Paula, gañadora do Master Chef Junior 4, preparou un taller de cociña para nenos na Praza da Constitución, mentres que, as sete da tarde, Pepe Solla foi o encargado de ler o pregón. O domingo, ao longo de toda a mañá, sucedéronse as intervencións en directo de Toño Lorenzo (Restaurante A Faragulla)  e Iván Domínguez (Restaurante Alborada), que cociñaron  diversos platos co queixo San Simón da Costa  como materia prima destacada.  Mentres, os distintos postos de venta apuraban unhas vendas consideradas igualmente significativas.

"Camiño da recuperación"

Despois da subida das vendas de queixo no 2015,  o pasado año, os productores lograron un incremento do 1 por cento. Segundo  o presidente da Asociación de Queixos San Simón da Costa, Javier Piñeiro, a comercialización do queixodesta denominación  vai "camiño da recuperación" e  aínda que non se están producindo os resultados de hai unha década,  estase a crecer agora a un ritmo de entre o 3 por cento e o 5 por cento.  No que se refire ás vendas no exterior, con varios frentes abertos xa anos atrás, estase pondo en marcha agora un importante mercado en Alemania.