A 46 Feira do Queixo Arzúa pechou edición coa participación de máis de 3.000 afeccionados que ao longo do pasado fin de semana se achegaron pola rede de internet aos actos programados para o encontro anual da exaltación do produto.  Houbo usuarios activos 'en liña' o sábado e o domingo procedentes de países como Arxentina, Estados Unidos, Canadá, Reino Unido, Francia, Italia, Holanda, Suíza Bélxica ou Rusia. Foron moitas tamén as conexións desde múltiples puntos de España. En 48 horas, os novos visitantes representaron o 84% do total das entradas.

O Concello de Arzúa -organizador do evento- denominou esta 46ª edición como 'XS', por estar dedicada especialmente aos nenos e tamén polo seu programa de pequeno formato e adaptado este ano para celebrarse totalmente 'en liña', coa retransmisión en streaming desde a web www.festadoqueixo.org

Un pregón colaborativo

O programa arrancou o sábado, 6 de marzo, cun pregón compartido, protagonizado e escrito de xeito colaborativo polo alumnado dos centros educativos de Arzúa. O pregón completo lérono desde a capela da Madalena un representante de cada centro. Aurora Varela,  concelleira de Cultura inaugurou o acto e deulle paso a Hugo Mera, de 3º da ESO do IES de Arzúa; a Manuel Alamancos Balboa, do colexio Nosa Señora do Rosario; a Celia Zapata, de 5º de Primaria do CEIP de Arzúa;  e a María Senín, que cursa o 1º ciclo de actividades comercias no centro EFA Piñeiral. A mecánica consistiu en que un dos cursos -a elixir polo propio centro- redactara unha parte do  pregón para que o continuase o seguinte.

As actividades continuaron o sábado cos showcookings 'Desde Arzúa, con amor e queixo', desenvolvido por tres restaurantes e un centro educativo arzuán. Desde as  12 da mañá, abriron as demostracións os restaurantes 1930, Hotel Boutique e Casa Chelo. Nelssy Soriano, do 1930 Hotel Boutique inaugurou fogóns desde a cociña do recinto feiral Terra do Queixo, preparando 'O Tótem, un entrepán de dobre tradición galega'. A continuación, María José Sanmartín de Casa Chelo, foi a cociñeira encargada de pechar as demostracións do sábado preparando unha 'diferente ensalada temperada con sardiñas afumadas e queixo de Arzúa'.

O domingo, a demostración de cociña iniciouna Pilar Rodríguez, do restaurante Fonte do Picho, coa receita 'Arroz meloso con polbo e queixo Arzúa-Ulloa'. Para rematar, Luisa Sánchez e María García da EFA Piñeiral, prepararon unha doce sobremesa amosando a receita 'Doces campos de Arzúa-Ulloa'.

Na tarde do sábado, celebrouse tamén a charla 'Os queixos galegos no tempo da covid', no set instalado na Capela da Madalena, un debate entre os representantes dos Consellos Reguladores dos queixos galegos con Denominación de Orixe Protexida, Arzúa-Ulloa e Queixo do Cebreiro. A organización considerou citar en Arzúa aos catro representantes dos queixos con DOP, pero, por dificultades de última hora, dous dos consellos non puideron estar fisicamente  presentes.

Festival do Queixo

No eido musical, o Festival do Queixo - igualmente denominado XS- programou dous concertos, un para rematar cada xornada. Ortiga pechou a  do sábado. Alma dueto fixo o propio o domingo, pechando a festa, que se celebra sen interrupción desde 1976.
​

G. S. Lourido

Entre tanto desacougo e entre tanto problema, escapou indemne a Festa do Queixo de Arzúa no 2020, por uns días. E, desde aquela, non se puido celebrar ningunha festa/feira do queixo máis en Galicia. Agora, cos lentos respiros que van vindo cara a normalización da vida diaria, os promotores do evento e os fabricantes do segundo queixo que máis se vende en España, reinventan escenario e ofrecen para o próximo fin de semana un programa que aproveita o mundo dixital e que ten na xente miúda un dos principais artífices e reclamos. Está en marcha a 46 edición da festa de exaltación do produto.

O programa ábrese o sábado,6 de marzo, cun 'pregón compartido', protagonizado e escrito por parte do alumnado dos centros educativos do concello coruñés de Arzúa, sede desta festa. Para iso, convidáronse todos os colexios do municipio para que elaborasen a mensaxe inagural.

Un dos cursos a elixir por cada centro será o que redacte unha parte do pregón, que se engadirá ás aportacións do resto dos centros.

Logo hai demostracións en directo -e sempre vía internet- da elaboración dos mellores pratos co queixo local como  protagonista. Por poñer un exemplo, María José San Martín, de Casa Chelo, será a cociñeira encargada de pechar as demostracións do sábado cunha 'diferente ensalada temperada con sardiñas afumadas  e queixo de Arzúa'.

Arroz meloso con polbo e queixo Arzúa

O domingo, a demostración de cociña correrá a cargo de Pilar Rodríguez, do restaurante Fonte do Picho,  coa receita 'Arroz meloso con polbo e queixo Arzúa-Ulloa' e de  Luisa Sánchez e María García da EFA Piñeiral, que prepararán unha sobremesa amosando a receita 'Doces campos de Arzúa-Ulloa'.

A música

No eido musical, o Festival do queixo celebrará dous concertos, un para rematar cada xornada. Ortiga intervirá o sábado 6 ás 21 horas.  Alma dueto pechará esta edición o domingo 7 ás 18 horas.

Debate

Na tarde do sábado, ás 18 horas celebrarase a charla “Os queixos galegos no tempo da COVID” no set instalado na Capela da Madalena. Será un debate entre os representantes dos catro Consellos Reguladores dos queixos galegos con Denominación de Orixe Protexida  (DOP) (Arzúa-Ulloa, San Simón da Costa, Queixo Tetilla e Queixo do Cebreiro). A organización considerou citar en Arzúa aos catro representantes dos queixos galegos con DOP por entender que, nestes tempos, a proposta pode ser unha boa oportunidade de promoción a nivel nacional e internacional a través da rede.
​