A.S.Rocha

É difícil afinar tanto sobre o importe das vendas como da asistencia a cada edición da Feira do Queixo de Friol e Pan de Ousá. Aínda así, na que se celebrou hoxe, sinálase que podería pasar do medio millón de euros en transaccións.  E, por asistencia -non xa de visitantes, senón polos milleiros de coches que se achegaron ata o concello-,  cabe tamén facerse unha idea. A partir destes argumentos, do que si se pode falar, e dun "éxito total", en liña coa versión oficial.

Facer estimacións non é doado,  pero hoxe, poucos minutos  antes de que se abrise a caseta municipial para agasallar aos visitantes cun viño e á degustación do queixo local, o rexedor municipal, José Ángel Santos,  sinalaba que en 2019 quísoxe evaluar o que podería quedar o día do feiral no concello. A estimación daquela estableceuse no medio millón de euros. "Posiblemente, hoxe, poderiamos incrementar ese importe", manifestou.

A estimación de asistencia coñecerase nos próximos días. Un primeiro balance sobre o número de coches que chegaron á localidade correspóndelle á Garda Civil  e podería coñecerse hoxe mesmo.

A Friol ven cada ano xente de moi diversa procedencia. Apuntou o alcalde neste sentido que hoxe estaban aparcados nas proximidades do feiral dous autobuses asturianos con xente visitando casetas e facendo compras.  E engadiu que a proposta callou tamén noutras autonomías, como a de Castela e León, "desde onde tamén nos chegan visitantes", dixo , e incluso desde Portugal.

Ao que madruga…

E en cuestión de oferta, aínda que o recinto feiral abre as súas portas - previo reparto de postos de venda-, ás dez e media da mañá- hai que andar prestos para facerse coas mellores pezas. Non en van, lembrou o alcalde que "hoxe, as dúas da tarde, seguro que non vai haber nada", nin queixo nin pan, claro. O prognóstico non é aventurado, é a repetición dun feito que se produce ano tras ano.

Durante a xornada dominical é tamén moi importante a vertente lúdica, a gastronómica - co  polbo como un dos produtos estrela-, a oferta feiral para mercar de todo un pouco segundo necesidades e petos, e a musical. O sabor  doce do peche da festa deste ano póñeno 'Os Satélites', que desde 1938 levan dando voltas con éxito polo panorama musical. 

QdeG

Despois do inicio en Arzúa da campaña de promoción dos queixos galegos para 2022, toca agora o tempo da exaltación do produto na 28 Feira do Queixo de Friol e Pan de Ousá. Será o vindeiro día 20 e acudirán á cita preto de 90 queixeiras, que porán á venda unhas 14.000 pezas, que estarán flanquedas por outras 4.000 de pan. Como de costume, cabe esperar que se vendan as existencias.

Tras a obrigada parada da feira os últimos anos no concello lucense, por mor da pandemia, a actividade volverase concentrar o próximo domingo arredor da carpa situada na praza Antón Cebreiro.  No seu interior estarán as queixerías do municipio. Fóra, haberá tamén unha ampla mostra do queixo que se fai nos concellos da contorna. Na carpa, aló pola unha da tarde, ofrecerase un viño e a degustación gratuita do queixo de Friol e do pan de Ousá.

Arredor da carpa instalaranse outros postos de venda de produtos agroalimentarios do municipio. Serán este ano, postos independentes, sen contacto cos espositores máis próximos, para reforzar as medidas sanitarias de seguridade.

E nas inmediacións, xa na praza Rosalía de Catro, estarán os vendedores de produtos de diferentes sectores, como os do textil ou o artesano, sen olvidar espirituosos como viños, sidras ou licores.

Gran dinamizador da activide económica local

A Feira do Queixo de Friol e Pan de Ousá, tal e como sinala o alcalde friolense, José Ángel Santos, é "o maior polo de atracción de visitantes" co que conta o municipio, así como un referente clave co que presentarse cara a comunidade autónoma.

Programa e medidas de control contra a covid

Para reforzar sanitariamente o programa de actividades previsto para a xornada dominical, o Concello tomará medidas co obxecto de evitar problemas coa covid. Así, o rexedor municipal sinalou que se reordenarán os espazos interiores para cumprir coa normativa vixente. Reforzaranse "os protocolos de sanidade, seguridade, limpeza e desinfección", para maior tranqulidade de expositores e visitantes.

A apertura da feira está prevista para as once da mañá. Haberá diversos actos e propostas ao longo da xornada, á que porá punto e final a actuación da Orquestra Los Satélites, ás dez e media da noite. 

​QdeG

A 47ª edición da Festa do Queixo de Galicia pechou o pasado fin de semana ao gusto de todos, dos organizadores, que consideran que foi un "rotundo éxito"; dos asistentes, que sen chegar a cifras de anos atrás, contáronse por milleiros e non tiveron atrancos importantes na vila e no recinto feiral; e de vendedores, que tamén contaron coa oportunidade de volver expoñer os seus produtos e facer caixa despois de moitos meses de pandemia.

O éxito de público valora o Concello de Arzúa -o organizador do evento- que quedou reflectido  especialmente na alta participación nas actividades programadas. Especialmente destascable foi a afluencia do sábado, na que as novas xeracións puideron desfrutar das actuación musicais de Marc Seguí e Zahara.

O domingo, despois dun discreto número de visitantes ao abrir o feiral, as rúas e  o recinto 'Terra do Queixo' foron incrementando asistencia, ata chegar a facer colas para degustar e mercar queixos, aínda que houbo fluidez o tempo de espera foi mínimo. E non faltou de nada na xornada, sol e terrazas cheas e algunhas gotas de choiva  con desbandada xeral para porse a colleito.  E tampoco faltaron os habituais avisos por megafonía recomendando prestarlle máis atención as carteiras, despois dalgunhas denuncias.

O recinto feiral pechou o domingo ás seis e media do serán, cando Ailá soaba xa na carpa, anticipando un peche de festa moi agardado, coa actuación de Guadi Galego.

A Festa do Queixo de Arzúa abre a temporada anual das celebracións para exaltar os queixos galegos. O próximo encontro será o 20 de marzo, coa celebración da 28 Feira do Queixo de Friol e Pan de Ousá. 

Gonzalo S. Lourido
​
Xusto no momento no que se acaba de confirmar oficialmente a celebración da segunda feira de queixos deste ano en Galicia -a de Friol, que, como se sabe, vai da man do pan de Ousá-  quedan moi poucas horas para entrar pola porta grande do recinto feiral Terra do Queixo de Arzúa. Aquí, máis de medio cento de queixerías recibirán este domingo a miles de visitantes interesados en mercar algunha peza para degustar este mes de marzo no que andamos. É festa, é gastronomía e moitas cousas máis.

E supón unha aproximación á normalidade, que os organizadores esperan que sexa 'ordenada' e con ese 'sentidiño' que desde hai dous anos se reclama e se practica. No recinto feiral 'Terra do Queixo' hai 56 casetas para a venda do produto. Noutras dez presentanse outras propostas difererentes e igualmente interesantes. A entrada é de balde, coma sempre, e habilitouse un único acceso de entrada e saída, co que en todo momento se manterá no recinto o límite de visitas establecido. Faguerase bo en certa medida  o dito de que  'antes de entrar, deixen saír'.

'Terra do Queixo', que xa abriu este sábado, poderá visitarse o domingo entre as dez da mañá e seis e media do serán. Nas casetas haberá unha oferta moi variada e de diversa procedencia, na que se inclúe o segundo queixo máis vendido das denominacións de orixe protexida (DOP) de España, adiviñen cal é? Pois sí, o Arzúa- Ulloa.

 E estarán tamén as mesas dos queixos que en cada edición desta festa ofrecen os produtores lácteos tradicionais (PLTs), que serán cinco para a ocasión, e que contan cun público incondicional, amante do queixo de sempre. Todos os queixos, tanto industriais como artesanais, e o resto dos produtos alimentarios, teñen o  obrigatorio rexistro sanitario.

Recomendacións para a conservación do Arzúa-Ulloa
​
Lembran os impulsores da festa -Concello e DOP Arzúa-Ulloa-  que este queixo arzuán segue madurando co tempo, polo que non se recomenda gardalo envolto en filme transparente ou papel de aluminio, xa que precisa respirar. Aconséllase gardalo nun lugar libre de cheiros fortes e a unha temperatura constante de uns 8-10ºC. Cómpre deixalo a temperatura ambiente un par de horas antes de degustalo, para poder apreciar mellor os seus aromas, sabores e texturas. O resultado será un queixo "boísimo".
​