A feira internacional  Semana Verde de Galicia ten no seu conxunto unha destacada compoñente de escaparate, que volveu funcionar estes días con intensidade no seu Salón de Alimentación do Atlántico. E esta é unha dimensión que vai gañando tamén relevancia no mundo dos queixos galegos, onde as vendas no recinto de Silleda (Pontevedra) -que non deixan de ser importantes no cómpunto de resultados das empresas- van dando paso, cada vez máis a unha información completa de que compra e como se compra. Neste escaparate puxeron os seus ollos máis de 128.000 asistentes.

Porque a venda directa xa non importa tanto como a posibilidade de fidelizar ao cliente e educar, na medida do posible, os padais dos menos iniciados, abrindo novas propostas de consumo e gastronómicas. As catas comentadas, as intervencións de avezados cociñeiros ou novos produtos que lle dan ao queixo un papel relevante que antes quedaba para as sobremesas, non fan máis que gañar adeptos. Pero non cabe dúbida tampoco de que a degustación a pé de caseta feiral segue a ser un bo reclamo para atraer aos amantes do queixo.

E como en anos anteriores, xunto coa actividade de venda dos postos,  fixéronse propostas interesantes, como a da  'Hoxe', queixería lalinense que ademais de catas comentadas dalgúns dos seus produtos, presentou unha cata-maridaxe con tres sidras elaboradas na Estrada.

Outra das novidades foi a presentada pola Sociedade Cooperativa Galega Condado-Paradanta, da man do cociñeiro e directo colaborador desta empresa Fran Sotelino.  Presentou cremas centradas no requeixo das Neves (Pontevedra) que poderán mercarse axiña, incluída a vía dixital, xa que a referida cooperativa prepara unha páxina web que facilitará a compra dos seus produtos.

Este domingo, a modo de avance,  presentouse na Semana Verde unha crema con guacamole, maionesa, requeixo e chile jalapeño. Asegurou o impulsor da cooperativa, Alejandro Martínez, que os mestres queixeiros que probaron o requeixo das Neves aseguran que se trata dunha gran pasta aceda, coa que se poden facer moitas cousas.

A oferta en materia de queixos galegos gañou igualmente coas propostas que presentaron a Cooperativa de Productos Campo Capela, Daniberto, Cooperativa Caprina, Dona Cobina, O Casal, Queinaga, Barral, Don Crisanto e Brigantia. Non faltou tampouco a liña de produtos lácteos de Larsa, que inclúe, xunto con iogures e leite, os seus queixos.

128.000 visitantes

Ao peche da edición este domingo da XLII edición da Semana Verde, informou a organización que desde o xoves ata hoxe acudiron ao certame 128.066 visitantes, aos que lle hai que sumar algúns que se achagaron a través de determinadas entradas de autobús (uns 2.000) e tamén nalgúns automóbiles.
Tamén se procura neste caso -como se ve- andar cos tempos no reconto de asistentes, xa que o feiral contou nesta ocasión cun sistema de cámaras con 'software' intelixente situadas nas seis entradas do recinto que lle permitiron á organización obter as referidas cifras de asistencia.

O municipio pontevedrés de Silleda puxo hoxe en marcha a XLII Feira Internacional Abanca Semana Verde de Galicia, que arranca co respaldo de cifras tan significativas como as do ano pasado, con 710 expositores directos,  unha superficie ocupada de preto dos 18.000 metros cadrados, 200 actividades e unha asistencia que os organizadores consideran que sobrepasou amplamente os 100.000 visitantes. Dentro do mundo dos queixos galegos, que é o que centra fundamentalmente estas páxinas, hai, cando menos 13 fabricantes do país, moitos das catro denominacións de orixe protexidas, e outros como o de cabra ou tradicional requeixo das Neves (Pontevedra).

Complementan a oferta os  elaborados noutros puntos de España, como  Quesos Crego (Palencia) ou o de ovella Idiazábal (País Vasco e Navarra). Así que os amantes dos queixos galegos poden facer acopio neste feiral dos que elaboran A Cooperativa de Productos Campo Capela, Daniberto, Cooperativa Caprina, Cooperativa Hoxe, Doña Cobina, O Casal, Queinaga, Barral, Don Crisanto, Brigantia, Castelo ou a Cooperativa Agraria Condado Paradanta, que ofrece o seu tradicional requeixo. Non falta tampouco a liña de produtos lácteos de Larsa, que inclúe, xunto con iogures e leite, os seus queixos.

Recital de degustacións

Todos estes días, haberá diversas degustacións de queixos, fundamentalmente na caseta de Economía Social de Galicia. Alí acudirán  ao longo de cada xornada, produtores como a Sociedade Cooperativa Galega Cobideza (Dona Cobina), cos seus queixos e o seu requeixo; a Cooperativa Galega Condado Paradanta, co requeixo e o mel da comarca; ou a Sociedade Cooperativa Galega Productores do Campo Capela.

O domingo, xornada na que se espera a maior afluencia de visitantes,  terá lugar, por exemplo, a cata de queixo organizada por Hoxe, Sociedade Cooperativa Galega, con sede en Lalín (entre as 12,00 e as 13 horas).  Ás 12,30 está programada tamén unha degustación de produtos na caseta de Economía Social de Galicia, con propostas como a de Cobideza (queixos e requeixo) e a da Cooperativa Condado Paradanta (queixo e mel).

Ao longo da xornada dominical haberá outras oportunidades de degustar e mercar queixos, como a programada para as 18,30 horas, que consistirá na cata-maridaxe de queixos Hoxe coa sidra ecolóxica da Estrada (Sidra Camiño, Sidra Peroja e Sidra Rivela).  A experiencia, que promete, pode levarse á casa. 
​