​O balance da 4º Feira do Queixo de Moeche foi "moi positivo" , e houbo máis xente este domingo que na pasada edición. Máis queixerías e, ás dúas da tarde, o que estaban transmitindo algúns postos de venda é que xa non tiñan existencias, mentres outras ían camiño do mesmo. Un dato significativo: algúns dos participantes confirmou vendas superiores mesmo ás de hai uns días no Fórum Gastronómico da Coruña. En conclusión, considera a alcaldesa de Moeche, Beatriz Bascoy, que a feira local do queixo entra na etapa de consolidación e que se pode "seguir apostando por este sector e por este produto", sinalou.

Entre as novidades deste ano -ademais da asistencia ao feiral da denominación de orixe asturiana Gamonéu- destacou a alcaldesa a presenza de máis queixerías que na anterior edición, algunhas delas cun curto pero máis que interesente percorrido, como é o caso da queixería de Guitiriz (Lugo)  Biscato, cun queixo moi especial que haberá que ir descubrindo, e que foi un dos que hoxe vendeu  todo.

Reclamos importantes foron os obradoiros para os máis pequenos, que puideron experimentar no campo da cerámica, con máis actuacións musicais que en 2018. E concentraron tamén a atención dos asistentes as catas de queixos.

Pero houbo máis novidades, como a presencia do queixo Galmesano (Arzúa/A Coruña), que se puxo no mercado no 2017 e que viña ao feiral a facer unha promoción que rematou a media xornada co cartel 'fin de existencias'.

Queixo ecolóxico local

E dentro do panorama local, houbo propostas importantes tamén, xa que Lácteos de Moeche presentou un queixo ecolóxico, acollido no Consello Regulador da Agricultura Ecolóxica (Craega). Trátase, en palabras da rexedora municipal, "dun éxito", ao lograr un queixo ecolóxico feito con leite dunha gandaría do municipio (Lavandeira) que acadou o certificado de leite ecolóxico, o que interpreta como un "unha alegría e un plus" xa que, ademais dos sesenta anos que leva Lácteos Moeche elaborando produtos no concello, estase a enriquecer con este recoñecemento "o sector lácteo noso", sinalou.

Valorou a alcaldesa a importante resposta dos visitantes pola mañá -co respaldo do bo tempo- e recalcou que o feito de programar actividades pola tarde, permite encher novamente o recinto feiral (de 1.200 metros cadrados) , non na mesma medida de horas antes, pero si coa intensidade suficiente para manter  visitantes e actividades de todo tipo que teñen na gastronomía e na proxección do sector lácteo a clave do encontro anual.

A importancia da innovación e das vendas no exterior

E un dato tan novidoso como importante, o alcalde da localidade asturiana de Onís, José Manuel Aveledo Viesca, invitado hoxe á feira en representación dun queixo tan emblemático como o Gamonéu, sinalou que Galicia ten potencial para producir queixo e comercializado e que co respaldo da Administración " ten que saír máis ao exterior", dixo, para recalcar que na súa estancia en Galicia, viu nos queixeiros galegos unha importante cualidade "á innovación".

​As festas gastronómicas no norte coruñés, con encontros anuais dabondo coñecidos como A Festa do Requeixo da Capela (a finais de agosto) ou o A Feira do Queixo do Eume e Mel de Goente (en outubro), teñen este fin de semana réplica no municipio de Moeche, que celebra a cuarta feira de exaltación do queixo local. Ao encontro acudirán en total 26 productores, entre eles, queixerías das catro denominacións de orixe protexida (DOP) de Galicia e un invitado moi especial, o queixo asturiano Gamonéu. Para achegarse ao encontro, un ano máis, funcionará o Tren do Queixo.
​
Co peche do programa definitivo xa hai uns días, o concello, organizador do encontro, facía público o programa de actos, que inclúe obradoiros infantís de cerámica e de elaboración de queixo, un concurso de cociña, varias catas comentadas, actuacións musicais e un espectáculo circense.

Para participar nas catas de queixo será preciso reservar praza con antelación no mesmo lugar onde se celebran. Son catas para un máximo de 20 persoas, cun prezo de 5 euros que inclúe a degustación de catro queixos e dun viño.

Tren do Queixo

O programa inclúe saídas da feira ao Castelo de Moeche e regreso novamente ao recinto. Como en edicións anteriores, non faltará o Tren do Queixo. Trátase dun servizo que busca facilitar os traslados a Moeche desde Ferrol e, ao mesmo tempo, reividicar o valor do ferrocarril como medio de transporte e como un servizo imprescindible para a comarca.

O Gamonéu, un convidado especial

E para enriquecer as propostas -ademais de produtores de San Sadurniño, Asturias, Castela e León, Estremadura, Cantabria e mesmo de Francia- por primeira vez, un convidado especial: o Gamonéu, un queixo das zonas de Onís e Cangas de Onís, dos máis exquisitos e tamén exclusivos dos que se producen en Asturias. Ademais de ter un lugar destacado na feira deste 17 de marzo, o concello foi convidado tamén a visitar a localidade de Onís, para coñecer polo miúdo o produto que, desde logo, non vai pasar desapercibido este domingo na 4ª Feira do Queixo de Moeche. 

A Festa do Queixo de Arzúa espera superar nesta edición que hoxe se pecha "todas as expectativas", despois de que o sábado acudise moita xente aos actos programados en que ao longo da xornada dominical houbese unha resposta similar, segundo as primeiras impresións do alcalde deste municipio coruñés, José Luis García. Un ano con outro, este encontro anual congrega durante tres días arredor do queixo e da música uns 40.000 asistentes. Choveu na xornada dominical, pero os paraugas e as ganas de pasalo ben superaron inconvenientes.

O concello, organizador da festa, busca cada ano traer algunhas novidades do mundo dos queixos para ofrecer algo distinto que probar e mercar, se é o caso, aínda que as grandes propostas están sempre na exaltación do queixo da zona, que non en balde e o segundo de España en vendas, e iso tendo en conta que boa parte da produción do Arzúa-Ulloa vai parar ás mesas dos galegos.

Mención especial entre as novidades queixeiras -aínda que nesta ocasión fundamentalmente emblemática- foi a elaboración dun macroqueixo, reproducindo o mapa de Galicia, elaborado cuns 4.500 litros de leite e que permanceu exposto durante toda a xornada nunha das entradas do recinto feiral. Foi, sen dúbida, o motivo máis fotografado da xornada, e iniciativa de Queixería Barral, que en 2018 sorprendou xa cunha proposta similar.

Outra das novidades foi a inauguración, o pasado xoves, 7 de marzo, da escultura 'homenaxe ao queixo', obra de Cándido Pazos, artista e embaixador do Camiño de Santiago por toda Europa. Entre outras moitas propostas, foi igualmente importante a celebración de catas e obradoiros a cargo da Denominación de Orixe Protexida (DOP) Arzúa-Ulloa, con diversas actuacións nos colexios, onde vai crecendo o interese por incluír na dieta un produto tan completo como o dos derivados lácteos, entre os que o queixo ocupa un lugar destacado.

Rematada a festa deste ano, asegura o alcalde de Arzúa que haberá unhas "semaniñas de descando" e que "rápidamente haberá que empezar a pensar e traballar na próxima edición".

Concurso de pinchos e tapas

A casa de Comidas Chelo foi o establecemento gañador do concurso de pinchos e tapas que a DOP Arzúa Ulla organizou esta semana como un acto completario desta festa.

 A tapa denominada 'Con queixo, pan e viño faise o camino' foi a que máis puntuación acadou na valoración do xurado, que durante a tarde so sábado percorreu os dez establecementos finalistas. O segundo premio foi para o 'Trampantojo de cocido con queixo Arzúa-Ulloa', unha orixinal creación de Casa Nené. E o terceiro lugar correspondéulle a 'Hamburguesa con Arzúa-Ulloa', da Cafetería Encontro.
​
No consurso tomaron parte vinte e dous establecementos da hostalaría da vila de Arzúa, que elaboraron as súas creacións con queixo cedido gratuitamente polo consello regulador.
 

Comenza a tempada feiral para os queixos galegos, coa celebración, este mesmo fin de semana, da 44 Festa do Queixo de Arzúa (A Coruña), á que seguirá o domingo, día 17, a de Moeche (A Coruña), para a que confimaron xa a súa asistencia un total de 26 produtores. A estructura será moi similar á das últimas tres edicións, concentrando na nave do mercado desde pola mañá ata a tardiña toda a actividade expositiva e comercial.

A Feira do Queixo de Moeche naceu co obxectivo inicial de servir como punto de encontro e escaparate da transformación leiteira na comarca e de dar a coñecer o queixo local, potenciando, deste xeito, unha parte do sector primario cunha prolongada tradición na zona. Celebrada a primeira edición, o Concello de Moeche, que organiza o encontro, apostou por darlle paso a un maior número de queixerías galegas e tamén doutros puntos de España e do estranxeiro.

O resultado, neste momento, son 25 queixerías participantes, ademais de Lácteos Moeche, que colabora na organización. Haberá queixos das catro denominacións de orixe protexida (DOP) de Galicia, sen olvidar produtores de San Sadurniño, Asturias, Castela e León, Estremadura, Cantabria e mesmo de Francia. Todo isto, gastronomicamente reforzado con outras especialidades de excelente calidade como pan, mel ou doces tradicionais.

Máis de nove horas para mercar e disfrutar
​
Das dez da mañá as sete e media da tarde, os asistentes terán oportunidade de participar en diversas actividades culturais, gastronómicas e turísticas, moitas xa coñecidas de anteriores edicións. Entre elas, obradoiros, catas e actuacións musicais.

Haberá tamén, por primieira vez, un convidado especial: o Gamonéu, un queixo das zonas de Onís e Cangas de Onís, dos máis exquisitos e tamén exclusivos dos que se producen en Asturias. Ademais de ter un lugar destacado na feira deste 17 de marzo, o Municipio de Moeche foi convidado tamén a visitar a localidade de Onís, para coñecer os pormenores do produto e, sobre todo, polo que poida ter de enriquecedor este produto e a feira que celebra a vila asturiana a finais de outubro, para trasladar experiencias ao certame coruñés. 

A Festa do Queixo de Arzúa cambiou este ano de data. E iso, co obxectivo de non coincidir co Entroido e que a xente puidese gozar de ambas festas. E co Entroido en plena efervescencia, chega a conta atrás para un dos 'supervendas' dos queixos españois. O xoves, 7 de marzo, inaugúrase a  escultura homenaxe ao queixo, creada por Cándido Pazos.  Hai moitas novidades máis, como a elaboración dun queixo xigante co mapa de Galicia. E está tamén o esperado pregón desta 44ª edición, que se lle encargou ao cociñeiro de 'Larpeiros', Benigno Campos. O domingo, día 10, chegaralle o turno aos queixos, coa gran exposición anual no recinto feiral. E logo música, moita e boa música.

Esta nova edición da Festa do Queixo Arzúa traballa coa idea de implicar cada vez máis á xente nova. Para ixo, convócase a terceira edición de 'Pequenoqueixo', pero está tamén a participación da mocidade na organización destre encontro,  para formar a un grupo de voluntarios en directa colaboración co Concello.

Para a ocasión, a Denominación de Orixe Protexida (DOP) Arzúa-Ulloa aportou 400 quilogramos de queixo gratuitos para petiscos, concertos e agasallos, e pensa esta denominación -de cara a un futuro próximo- sumarse á celebración do Xacobeo 2021, impulsando o Camino do Norte co queixo, unha decisión que non fará senón darlle máis proxección.

O queixo na escola

A DOP  quixo valorar neste nova edición da festa a participación da xente moza na preparación de degustacións no seu posto feiral, e na realización de obradoiros  especialmente indicados para a participación de nenos e nenas, coa importante intención de achegar aos máis pequenos a importancia de incluír o queixo na súa dieta. Para iso, cada ano, fanse actividades e obradoiros nos centros educativos. É, sen dúbida, un labor que debe medrar exponencialmente, non só nesta senón nas restantantes denominacións galegas.

E para a promoción do queixo nos días previos a festa de exaltación, está en marcha tamén o XIII Concurso de Tapas e Petiscos, que organiza a DOP, e que se poden degustar xa nos establecementos da vila arzuana entre as 18,00 e as 23,00 horas.

Nesta 44 edición apuntáronse a festa do queixo u total de 70 expositores, con 13 queixerías da DOP Arzúa-Ulla e seis postos de produtores lácteos tracionais (PLT) - todos eles co seu correspondente rexistro sanitario, segundo obriga a normativa legal. Hai, igualmente, 29 queixerías de diversa procedencia. Pero fóra do recinto queixeiro hai moitas e moi variadas propostas máis.