O mundo dos queixos galegos ten desde hai uns meses un novo fabricante, Casa Zolle (Friol, Lugo), que aproveitou a celebración da última Feira do Queixo e Pan de Ousá para facer a súa presentación oficial. Á fronte da empresa está Ovidio Zolle Vázquez, que fala dunha fábrica artesanal coa referencia dun produto sen denominación de orixe que pretende, fundamentalmente, divulgar e confrontar o queixo lucense de Friol "coa calidade máis grande que hai", afirma.

Non repara Ovidio Pérez en ponderar as bondades do queixo do municipio, do que di "se fai só", polas explotacións, "que aportan leite galego cento por cento", o que supón que se trata "dun produto diferenciado, con vacas de pastoreo", destaca.

A partir de aí, argumenta este fabricante que o leite pasa por uns circuítos pechados, en salas independentes, nos que se lle bota o sal, o cuallo e o fermento. Logo, vén unha curación na que se persegue obter "un queixo manteigoso, un queixo cremoso e un queixo vivo", que logo hai que coidar moito para evitar que críe mofo.

Leite crú

O produto que sae desta fábrica é queixo elaborado a partir de leite cru, aínda que sinala Ovidio Zolle que conta cun pasteurizador que se está utilizando, exclusivamente, "para quentar a camisa da cuba" con obxecto de que o leite estea á temperatura que esixe o xefe de fábrica.
E fai o queixo con leite crú porque é o que lle piden os consumidores. Acaba de empezar e ten unha importante cantidade de produto para vender non so no mercado galego, senón noutros de referencia tan importantes como o madrileño ou o catalán, "para os que se busca ter sempre queixo dabondo para atender a demanda que se produza".

Casa Zolle non ten vacas propias, traballa coa Cooperativa de Friol, á que lle pide unhas calidades determinadas tanto en proteínas como en bactereoloxía. Son vacas de pastoreo galegas.

O mercado manda

Nos inicios, coincidindo coa celebración da última Feira do Queixo e Pan de Ousá, a previsión era producir uns 400 queixos diarios, que supoñen uns 120.000 ao ano. Pero a fábrica ten capacidade para triplicar a produción. "Todo está preparado para iso", sinala, polo que  dependerá do que o mercado demande en cada momento.

Casa Zolle é unha sociedade limitada única, con sede no polígono industrial municipal e unha pequena plantilla de traballadores. Recalca este queixeiro que o principal obxectivo da fábrica é proxectar o queixo de Friol, que insiste en que "é un produto moi demandado non so na comarca ou en Galicia, senón tamén en España".  
​

Os amantes dos queixos galegos tiveron este fin de semana en Silleda importantes novidades, coa presentación de novos produtos incorporados xa ao mercado ou que se porán a venda nunhas semanas. Non faltaron tampouco as degustacións, a preparación de pratos, petiscos e sobremesas elaborados a partir do derivado lácteo. Se algo destacaron os expositores, ademais dunha certa evolución positiva na comercialización dos seus produtos no presente exercicio, foi a presencia masiva de público ao feiral da Semana Verde.

Entre as novidades, destacou a presentación dun queixo de untar, obra da Sociedade Cooperativa Hoxe, de Lalín. Trátase dun produto novo que está a demandar o mercado e do que o xerente da queixería, Lito Andión,  sinala que " non lle quero chamar torta do Casar" pero pode servir a idea "para que a xente teña unha referencia, porque non hai ningún tipo de referencia deste queixo en Galicia", argumenta.

Ten un sabor cítrico, resulta moi fácil de comer e, pola súa textura, préstase especialmente para untar. Na presentación, hoxe domingo, empregouse o pan de millo. Ao ser especialmente cremoso convértese, xa que logo, nun queixo  ideal para untar, co parecido á torta do Casar no que se refire só á textura, pero totalmente distinto no seu sabor.

A previsión é polo á venda no prazo dun mes, aproximadamente, pero "pouco a pouco", porque en principio non é doado de facer. Inicialmente estará só nalgunhas tendas - para o cliente que o demandou- e, con posterioridade, iráse incorporando a toda a rede de distribución da queixería. 
​

Crema de requeixo das Neves
Entre as propostas queixeiras desta nova edición da Semana Verde, estivo a da Cooperativa Condado-Paradanta, que prepara novos produtos, como a crema de requeixo, que este domingo tiveron oportunidade de degustar moitos visitantes do feiral. Está preparado tamén para comercializar o "cremoso de requeixo, para acompañar doces e salgados", segundo destaca o xerente da cooperativa, Alejandro Martínez.  
 
O proxecto está xa desenvolvido "no papel", valorado e presupostado,  e búscase agora o financiamento, mentres se está xa cos permisos de obra para axustar o obradoiro á elaboración destes novos produtos. O mes de setembro deste ano é a referencia coa que se traballa inicialmente para presentalo todo na cooperativa.

A idea é que o consumidor final poida levar por separado o requeixo das Neves e as cremas. E hai tamén hai unha liña como base para a elaboración de pratos e sobremesas destinadas aos restaurantes de Galicia. Nestas novas propostas é parte fundamental o chef Fran Sotelino, xerente e propietario do catering Bluemoon Gastro.

'San Roquiño', de Daniberto

Entre as novidades do feiral estivo tamén a doutro novo produto da queixería vilalbesa Daniberto, 'San Roquiño' -un queixo curado de leite pasteurizado de vaca que tamén tiveron oportunidade de probar e mercar os visitantes da Semana Verde- ou os recentes tamén da Cooperativa Caprina Galega, con propostas como o queixo semicurado de cabra con pemento doce  ou o elaborado con arandos. 
​

O queixo galego ten na Semana Verde de Galicia unha crecente importancia. Nesta ocasión, seguindo o programa de expositores, estarán no recinto feiral de Silleda (Pontevedra) camiño da ducia de fabricantes, que ademais de produtos das catro denominacións de orixe protexidas (DOP) galegas, aportan outras variedades, incluídos os queixos ecolóxicos. E no faltan os de cabra ou o tradicional requeixo de As Neves, sen esquecer marcas procedentes doutros puntos de España, como o Idiazábal (Guipúzcoa).

Para degustar e mercar todas as referencias que presentan as queixerías, mañá domingo será día clave do feiral, no que non faltarán as aportacións dalgúns dos postos de venda, nos que se se programarán actividades tanto para coñecer aspectos fundamentais dos produtos como as súas posibilidades no mundo da gastronomía.

Este pode ser o caso, por exemplo, da Cooperativa Hoxe Queixos, de Lalín (Pontevedra), que ofrece unha ampla mostra de produtos, entre eles os procedentes das denominacións Arzúa-Ulloa e Tetilla. Nas súas instalacións, seguindo as pautas de edicións anteriores, poderá asistirse a interesantes catas de queixo comentadas.

Os amantes do queixo Daniberto,  da denominación de orixe protexida San Simón da Costa, terán oportunidade de adquirir reservas para os próximos meses. Pero, da Tarra Chá hai tamén mostas como da Queixería Don Gabino, que oferta o San Simón de sempre e outros produtos como o queixo graxo madurado. Está tamén neste feiral a Queixería don Crisanto, cos seus queixos San Simón, os da denominación Tetilla, o 'patelo' -que ven a ser o queixo do país de sempre- e tamén un requeixo propio.

Requeixo de As Neves

Un habitual de Semana Verde é o requeixo e mel de As Neves (Pontevedra), unha cooperativa moi seriamente danada nas súas instalacións no grave incendio forestal do ano pasado no municipio e que, sen dúbida, volverá estar a pleno rendemento na próxima festa da exaltación deste emblemático requeixo do sur de Galicia.

Pero as opcións queixeiras non se esgotan aquí, porque estará  en Silleda tamén A Cooperativa Caprina Galega, con sede en Ponteareas, con interesantes produtos. No posto de Dairylac (Melide/A Coruña), ofertanse este fin de semana os seus queixos de Arzúa-Ulloa e Tetilla, , así como queixo crema e queixos en barra (Edam, Cheddar e Gouda).

Dona Cobina (A Golada/Pontevedra) ten entre as súas propostas queixos das denominacións Arzúa-Ulloa e Tetilla, así como queixo de 'barra país', o seu coñecido queixo ecolóxico e un requeixo.

Está presente tamén en Silleda, outra das zonas importantes de produción queixeira galega, Curtis (Lugo) coa recoñecida firma Queinaga, e non faltan outras igualmente significativas do panorama galego, como é o caso de Queixos Barral (Arzúa/A Coruña) e Queixos Castelo, unha pequena empresa familiar da localidade lucense de Pedrafita do Cebreiro a que hai que agradecer a recuperación deste produto e que chegase a obter a denominación de orixe protexida Cebreiro.

A semana Verde de Galicia está na súa 41º edición, un ano máis coa colaboración da entidade financeira Abanca. Ofrece nestes días máis de 200 actividades, nun proxecto que apunta a un rexurdir que, segundo os seus impulsores é  "motor económico de Galicia e símbolo de emprendemento". O domingo pecha as súas portas. 
​