O ano pasado participaron nestes cursos gratuítos máis de 80 persoas
G. S. L.
Sabor, calidade e prezo son argumentos que defenden os queixos galegos, así que o éxito está asegurado. Pero como hai tempo xa que non chega con ter un ' bo produto gardado no arcón', nen conformarse cos sabores de sempre, convén deixarse levar pola man dos expertos e mellorar. Por iso, é unha excelente noticia que volvan os cursos sobre análise sensorial dos queixos gelegos con Denominación de Orixe Protexida (DOP), da man da experta catadora Salomé Beiroa. Van dirixidos a persoas vinculadas ao sector e a industria agrogandeiras, para que adquiran ou melloren competencias para elaborar mellor os seus productos.
Serán, en total, dez accións formativas que se impartirán en distintos puntos da xeografía galega. Seis xornadas adicaranse á iniciación e outras catro serán de formación complementaria. Desenvolveranse entre os meses de agosto e setembro, para que persoas vinculadas ao sector e industria agrogandeiras “adquiran ou melloren competencias para poderen elaborar mellor os seus produtos”, indica a formadora.
Dado o “gran aproveitamento” que na primeira edición desta formación obtiveron os máis de oitenta alumnos e alumnas que preparou, Salomé Beiroa propuxo retomar a actividade este ano, que está financiada con fondos europeos (Feader) así como pola Axencia Galega de Calidade Alimentaria (Agacal), dependente da Consellería do Medio Rural.Tamén colaboran os catro consellos reguladores dos queixos galegos con DOP, así como outras entidades.
Para denominacións, produtores, elaboradores e industrias transformadoras
Calquera persoa vinculada ao sector agrogandeiro (produtores, elaboradores e industria transformadora) pode inscribirse gratuitamente nesta acción formativa, non só quen se dedica directamente á fabricación de queixos, senón tamén os produtores lácteos, comercializadores e outros.
“Malia que o leite chega ás queixerías desde o sector primario, os queixos galegos aínda precisan ser moito máis coñecidos entre as persoas que todos os días abastecen del a industria”, afirma Beiroa. Un dos obxectivos da formación é a promoción e protección da calidade diferencial dos produtos alimentarios galegos acollidos aos distintos indicativos de excelencia. Neste sentido, a catadora apunta que “temos catro tesouros” que divulgar.
Nas sesións formativas abordaranse cuestións como a degustación do produto, saber apreciar as súas características ou como dar valor aos parámetros que garanten a súa calidade.
Segunda edición, datas, inscripcións gratuítas
As inscricións son gratuítas nos dous niveis formativos A formación desta segunda edición comezará coas sesións de formación complementaria, dirixidas a aquelas persoas que realizasen o ano pasado a inicial ou ben que dispoñan de coñecementos en análise sensorial.
A primeira data será a dos vindeiros días luns 30 de agosto e mércores 1 de setembro no CFEA de Sergude (Boqueixón, A Coruña), para continuar en Vilalba (Lugo) os días 6 e 7, os 13 e 15 en Lamas de Abade (Santiago de Compostela, A Coruña), finalizando o 20 e 22 en Lalín (Pontevedra).
O alumnado interesado en participar nalgunha das vinte sesións programadas poderase inscribir sen custo ningún cubrindo un formulario en liña (https://i.gal/formacionqueixos2021) no que se poderá seleccionar a localidade en que desexa participar: Santiago de Compostela (Lamas de Abade), Boqueixón (Sergude), Vilalba, Palas de Rei, Melide ou Lalín. Tamén poderá escoller se as xornadas que lle interesan son as de formación complementaria ou inicial, a celebrar entre o 27 de setembro e o 17 de novembro.
Para máis información, pódese enviar un correo electrónico a formacion.queixos@beiroa.org.
Con esta proposta, a catadora insiste en que se procura “achegar a industria e o sector agroalimentario a uns produtos excepcionais”, como son os queixos galegos con DOP (San Simón da Costa, Cebreiro, Arzúa-Ulloa e Tetilla).
A catadora Salomé Beiroa volve presentar este ano os cursos sobre a análise sensorial dos queixos galegos
Fuente RSS
