G.S.L.

A XXX Festa do Queixo San Simón da Costa non desmereceu das celebradas nos últimos anos, nas que os fabricantes amosáronse satisfeitos, polo que cabe concluír que o éxito segue acompañando este feiral, que conta cunha ampla representación de queixeiros de toda Galicia, así coma doutras autononomías e mesmo de fóra de España. Nesta ocasión abriu tamén un posto a European Cheese Route, asociación de concellos que persegue promocionar o queixo como oportunidade para o desenvolvemento local.

No ano 2024, a Festa do Queixo foi posiblemente a mellor. Houbo sol e os asistentes contáronse por milleiros. As vendas non quedaron atrás. Tamén no 2025, viñeron moitos visitantes e os fabricantes locais fixeron ‘caixa’ igualmente. Esta fin de semana, repetiuse a imaxe, con centos de visitantes degustando os queixos e mercando as mellores pezas, entre unha amplísima gama de referencias.

Mentres o concello vilalbés fala de que se superaron as expectativas, o Consello Regulador da  Denominación de Orixe Protexida (DOP) San Simón da Costa recoñeceu unhas vendas “espectaculares” durante o sábado, unha referencia que o domingo se repetíu  cando menos no número de asistentes, que na hora previa ao xantar volveron abarrotar a praza, augurando unha edición que podería mellorar a das últimas cinco edicións, segundo Lucía Fraga, secretaria do Consello Regulador da DOP San Simón da Costa.

Contribuiu ao éxito a aportación do apartado musical, que ten tamén un público ben sólido, sobre todo entre a mocidade. Para a ocasión contratáronse artistas como Mondra e 9Louro que congregaron o sábado a milleiros de persoas.

European Cheese Route

Un dos asistentes á Festa do Queixo foi a European Cheese Route, unha asociación de concellos que persegue promocionar o queixo como oportunidade para o desenvovemento local,  con temas como a cultura e o turismo queixeiros.

A asociación participa nas feiras galegas daqueles concellos que son socios, co que as queixerías constitúense como “embaixadoras dos nosos territorios”, segundo explicou Javier Sánchez, director da secretaría técnica deste colectivo.
​
Actualmente, forman parte do Ruta Europea do Queixo  os concelllos de Arzúa (A Coruña), Vilalba (Lugo) e Vilar dos Santos (Ourense).

A.S.R.

O municipio pontevedrés das Neves transfórmase cada ano durante a Semana Santa na capital do requeixo galego, recoñecemento que comparte a finais do mes agosto co concello coruñés da Capela, que tamén ensalza produto propio, curiosamente, na súa parroquia das Neves. Este venres e o sábado, a Sociedade Cooperativa Condado-Paradanta volveu levar ao evento dúas toneladas de requeixo, o que representa, aproximadamente, un 10 por cento da produción anual.

O requeixo con mel púidose degustar na carpa do recinto feiral a prezos populares (2,5 euros), ou levalo como sobremesa para a casa en paquetes dunha ducia, media ou tres unidades, sen olvidar a tarta fresca de requeixo ou a crema de requeixo.

O mel -o outro produto exaltado estes dous días- con botes dun quilogramo, 400 e 275 gramos, compartiu éxito de vendas, con propostas como a do mel con noces.

Sen variación nos prezos

Desde hai varios anos que o queixo e o mel que elabora a Cooperativa Condado-Paradanta non subiron os prezos, algo que destacou o presidente, Alejandro Martínez, quen dixo ademais que a tendencia é seguir mantendo a produción actual.

Requeixo e mel pódense comprar a través da páxina web da cooperativa, con envíos gratuitos a partir de 50 euros. 

​Carmela López, presidenta da Deputación de Lugo e alcaldesa de Burela

Gonzalo S. Lourido 

Pedrafita brillou hoxe dobremente, pola celebración da súa feira anual do Queixo do Cebreiro e polo sol, que fixo acto de presencia e ás ledicias de milleiros de visitantes e dos máis de 150 postos de exposición e venda de productos agroalimentarios, que lle deron colorido e prestancia ao encontro. A nota documentada e en clave antropolóxica sobre a montaña lucense e as súas xentes, púxoa a pregoeira, Carmela López, alcaldesa de Burela e presidenta da Deputación de Lugo.

Na chaira do recinto feiral, ateigada de visitantantes, disque moitos procedentes de terras leonesas que se achegaron despois de asistir ás procesións da Semana Santa, Carmela López trasladóulle a veciños e visitantes “o valor que ten a xente da montaña”, porque con todas as dificultades do territorio, e deses servizos “que costa tanto traer”, o feito que se “viva aquí”, que se manteña, que se aposte por este produto -en relación co queixo- e por esta terra, “meréceo todo, porque é moi complicado vivir aquí”, reiterou.

Engadiu que a sanidade, a educación e demais servizos que para otras persoas están a dez minutos, “son algo complicado aquí”. “Para min, a xente da montaña mereceo todo, porque é moi complicado vivir aquí, e a xenta aposta polo territorio e por quedarse”, concluíu.

Queixo de primeiro e de sobremesa

Dixo tamén a pregoeira que ela podería vivir “comendo só pan e queixo”, para engadir que nas cousas máis simples esta o esencial, e iso é o que ten o voso queixo, por iso é tan especial”.
Dixo tamén que no rural non é un lugar no que faltan cousas, senón que é un lugar onde están as cousas realmente importantes.

Para a rexedora burelense, o queixo do Cebreiro é "un orgullo colectivo, o voso orgullo e o noso orgullo tamén", como igualmente “unha maneira de dicir quen somos” e “de compartir co resto do mundo o que temos”, argumentou. Por iso, valorou a importancia para un territorio manter celebracións como a de hoxe.

Fóra xa do pregón, Carmela López recoñeceu que o queixo “é o meu alimento favorito”, e que de nena, a súa avoa tiña unha tenda de ultramarinos e vendía todo tipo de queixos galegos. “Ou sexa  que coñezo o queixo desde moi pequeniña”, concluíu. 
​

QdeG

Galicia concentra esta fin de semana tres das súas feiras de queixos, dúas acollidas a algunha das denominacións de orixe protexida (DOP) e a terceira a do requeixo no sur da Comunidade Autónoma. As expectativas son boas, xa que os meteorólogos falan de continuidade do bo tempo. Cada unha delas, por méritos propios, colleitará milleiros de visitantes, aínda que  difíciles de concretar, co que a asistencia mídise máis pola gradualidade dos  ‘cheos’   e pola dimensión das  ringleiras de coches aparcados.

A primeira feira, como tódolos anos, desde hai 37 edicións, e coincidindo coa festividade do Venres Santo,  é a do Queixo do Cebreiro (Lugo), recoñecida como festa de Interese Turístico de Galicia.

A segunda, no concello pontevedrés de As Neves, é a Feira do Requeixo e Mel, que entra neste caso na súa 33 edición. Cadra coa de Pedrafita do Cebreiro, pero amplía a súa celebración ao sábado 4 de abril. Tamén está declarada de Interese Turístico de Galicia.

E pechando a semana, o municipio lucense de Vilalba, capital da Terra Chá (Lugo), celebra a Festa do Queixo San Simón da Costa. O domingo é o día grande, pero o sábado, día 4, tamén haberá actividades lúdicas e gastronómicas. Este queixo afumado fabrícase baixo  a denominación de orixe protexida San Simón da Costa, aínda que estes fabricantes elaboran tamén otros produtos como o  Queixo Tetilla ( Con DOP propia), o tradicional patelo desta zona, o requeixo e cada vez máis especialidades.

Pero cada feira/festa é un mundo, porque, arredor dos queixos locais ou comarcais, chegan cada vez con máis forza outros moitos queixos galegos, e algúns de España e de fóra, co que costa crer que a quen lle guste o produto non remate por mercar unha ou dúas pezas.

Máis feiras

Celebradas xa a Festa do Queixo Arzúa (A Coruña), a Feira de Moeche (A Coruña) e a do Queixo de Friol e Pan de Ousá (Lugo), e deixando  a un lado as dos próximos días,  quedan  pendentes no calendario anual galego a Feira de Queixos de Pontedeume (A Coruña), o 25 e 26 de abril; a Festa do Requeixo da Capela (A Coruña), o 30 de agosto; e a Feira do Queixo do Eume e do Mel de Goente (A Coruña), con data por decidir e que o pasado ano se celebrou o 12 de outubro. 

A.S.Rocha
 
​O concello lucense de Friol pechou esta fin de semana a súa feira do queixo e do pan con moito público -máis de 20.000 persoas, segundo as primeiras estimacións-, pero tamén se colocaron nos postos de exposición e venda 3.000 pezas de queixo máis en relación coa pasada edición. O resultado foi o esperado: camiño das dúas e media da tarde xa non quedaba nin queixo nin pan na carpa instalada na praza de Andón Cebreiro. Fóra, na contorna, ducias de postos do máis diverso seguiron amenizando e alixeirando a carteira dos visitantes, desde os postos do polbo á feira ata os de artesanía, roupa ou alimentación.

A 32 edición da Feira do Queixo de Friol e Pan de Ousá volveu render homenaxe a estes dous produtos e xa foi recoñecida hai varios anos como Festa de Interese Turístico de Galicia. Non era doado, pero  isto contribuíu a que se lograse proxectar o encontro fóra da Comunidade Autónoma. A modo de exemplo, o alcalde local, José Ángel Santos, puxo a chegada ao feiral -despois do mediodía- de dous autobuses de Asturias. “Antes iso non sucedía, porque pode que a feira non fose dabondo coñecida fóra”, dixo.

Aumentou o número de visitantes e tamén o número de pezas á venda. Aínda que o concello non ten datos concretos sobre a produción de queixo no municipio, sinalou o rexedor municipal que, da produción láctea, “entre un 10 por cento e un 15 por cento vai destinado á elaboración do queixo”.

Foron 42 as queixerías asistentes,1.000 as pezas de pan expostas e vendidas e os queixos chegaron aos 13.000, uns 3.000 máis que en 2025.

Un decreto “paraugas”

En relación con que se o decreto da Xunta que regula as denominación xeográficas de calidade do sector alimentario satisface as expectativas do queixo de Friol, José Ángel Santos sinalou que está a repercutir positivamente “dalgún xeito”, pero “nós temos un problema”, porque no territorio está implantada a denominación Arzúa-Ulloa e, como están moi próximos, “Friol non ten territorio suficiente para ter unha denominación propia”, argumentou.
​
Na súa opinión, o decreto tiña que “especificar un pouquiño máis ou, incluso, darnos cobertura; que nos dera un paraugas legal para poder optar a esa denominación”, concluíu.

A.S.R.

Desde o mediodía ata a hora de xantar, cando os visitantes empezararon a mudar de escenario, a nave na que se celebrou a VIII Feira do Queixo de Moeche foi un fervedoiro de xente. Todos interesados, uns por degustar produtos tan suxestivos como diversos -algún novos- e outros por aprovisionamento e para facer ideais as sobremesas no tránsito cara a primavera. O resumo do resumo está en que a esta edición acudiu máis xente, houbo máis queixo e as vendas medraron.

Os primeiros datos apuntan a que as queixerías venderon máis que na edición de 2025, dato contrastado a pé de posto de venda e coas enquisas feitas polos organizadores,  e que se apoia, por exemplo en que, ás tres da tarde, houbera xa produtores que venderan xa todas as existencias.
 
A alcaldesa do Concello coruñés de Moeche, Beatriz Bascoy, considera que o ano pasado marcou unha inflexión na asistencia de visitantes, que agora se mellora, con aportacións como a novidade de contar co Mercado de Artesanía Agroalimentaria da Deputación da Coruña.

Na súa opinión, a proposta supón a incorporación de novos postos que axudan a consolidar a feira e que supón tamén un aforro nos gastos do concello, ao asumir actividades que non pasaron desapercibidas por os visitantes, que encheron tamén  a carpa montada para a ocasión.

Tamén estivo atestada de xente a nave destinada a xantar, con centos de quilogramos de polbo  fervendo nas potas. Un dos tres panadeiros que acudiu ao feiral votou contas e concluíu que ao longo da xornada as vendas andarían polas 300 pezas de pan, das grandes, das de mollar, de Palas de Rei.

Entre os productos novos, descatou desta volta o queixo afumado -tamén de barra- de Lácteos de Moeche, así como un produto moi especial que fai Quesos Feijoo para algunhas feiras e en cantidades moi cativas, un queixo dun padal comparable  á   tetilla, boa tetilla, a de toda a vida, pode que como aquela que de cando en vez celebraba  Álvaro Cunqueiro  cando lle chegaba como agasallo da man dalgún amigo, se acaso, no coche de liña ou no da feira.                                                                                        

QdeG

Un total de 35 fabricantes participarán este domingo na VIII Feira do Queixo de Moeche. Na mostra, que os queixeiros consideran xa a efectos de vendas como unha das máis importantes que se celebra na comunidade autónoma, conta ademais con 32 expositores de produtos agroalimentarios.

Desas 35 queixerías, 20 son galegas e 14 proceden de distintos puntos de España. Haberá tamén un posto que ofrecerá queixos de Italia, Francia e Suíza,  co que o abano é amplo e ben representativo para os que gustan deste produto.

Como xa aconteceu na 51 Festa do Queixo Arzúa, entre as novidades deste feira destaca a presenza do Mercado de Artesanía Agroalimentaria da Deputación Provincial da Coruña.

O cociñeiro André Arzúa, promotor do centro gastronómico ‘Espazo abella’, realizará demostracións culinarias e a banda De Ninghures porá o peche musical á feira.
​
Polo demais, as actividades paralelas serán múltiples e para todos os públicos,  con catas, obradoiros, visitas ao castelo de Moeche ou a posibilidad de acudir a este evento anual desde Ferrol no ‘tren do queixo’, que lle facilita o transporte cada ano por estas datas ao concello coruñés a centos de visitantes.

QdeG

O concello coruñés de Arzúa congregou durante a pasada fin de semana camiño dos 40.000 visitantes na Festa do Queixo, segundo a estimación dos organizadores, que contaron coa axuda do tempo como gran aliado. Os efectos do sol levaron ao remate a un balance “moi positivo” e a cifras récord de participación, se se deixan a un lado os resultados do ano 2025 -no 50 aniversario do feiral, no que a cifra chegou ata os 50.000-.

Resultados extraordinarios como os do ano pasado e o ‘boca a boca’ entre os fabricantes de queixo fixo que nesta ocasión acudiran a Arzúa por primeira vez algúns queixeiros galegos que coincidiron en siñalar que as ventas chegaron a duplicarse e mesmo a triplicarse en relación con otras feiras galegas.
​
De feito, superáronse tamén as marcas nas solicitudes de queixerías e dos postos exteriores, ata o punto de que algún fabricante non puido chegar a instalar un punto de venda por falta de espazo. Do mesmo xeito, houbo un gran impacto nas vendas e moitas queixerías esgoraron o produto.

O éxito foi igualmente total no que se refire á asistencia ás catas e á cocina en vivo (coas 500 prazas cubertas e lista de agarda).

A programación musical, infantil e as actividades exteriores contaron tamén cunha gran afluencia de público, co que consideran os organizadores que a Festa do Queixo se consolida como unha das citas gastronómicas e culturais máis relevantes de Galicia.

Máis cifras

En total, foron admitidas 77 queixerías, ás que se uniron outras nove convidadas da Ruta Europea do Queixo, mailos catro postos institucionais.  Os noventa espazos de exposión, venda e promoción do produto ocuparon toda a pranta baixa do recinto feiral interior. A certas horas da mañá, as aglomeracións diante dos postos de queixo foron unha constante, como tamen a vixilancia e as múltiples advertencias da Policía Local e da Garda Civil para ter “man das carteiras”.

Para o exterior, rexistráronse máis de 215 solicitudes de postos de alimentación, gastronetas, artesanía e propostas multisectoriais, a cifra é a máis alta da historia da festa, o que obrigou a ampliar o percorrido, coa incorporación de novas rúas para darlle resposta á elevada demanda, pero mantendo os mesmos criterios de calidade e seguridade. A programación completouse co mercado da Deputación da Coruña 'A paisaxe que sabe', que aportou 24 postos de venda adicionais adicados aos produtos de próximidade.

C.R.S.
​
Bicos, son sempre bicos, e por suposto tamén os gastronómicos, que poden ser  igualmente sutís. Uns deben ir directamente ao corazón, que como se sabe ten as súas razóns que a propia razón non ten. Os outros, aparentemente máis sinxelos, medran ao pasar directamente polas papilas gustativas e dispáranse xa no retrogusto cara a mundos imaxinativos interiores.

Pero ben, en todo este proceso, sen ánimo de distraer, senón de complementar, aportaron estes días  os hostaleiros da vila coruñesa de Arzúa -con motivo da súa 51 Feira do Queixo- un mundo paralelo de sabores, nun petisco, se acaso abrasador e/ou tórrido- capaz de derreter cremosidades en boca e de fidelizar aos amantes dos queixo. Disque algúns bicos -e con razón- non se lle deben dar a calquera, pero se son de Arzúa ou da comarca da Ulloa, poden ser bicos a esgalla, nos beizos…, sempre con queixo. 

Un pincho, un bico

Pois si, o Bar Os Amigos foi o establecemento gañador do concurso de pinchos, tapas e petiscos que a Denominación de Orixe Protexida Arzúa-Ulloa organizou esta semana como acto complementario da 51 Festa do Queixo en Arzúa, que este domingo celebra o seu día principal.
A tapa, denominada ‘Ulloa Tropical’ foi a que máis puntuación acadou na valoración do xurado, que na tarde do venres percorreu os dez establecementos finalistas.

O segundo posto foi para o ‘Bico de Queixo’, unha creación da Cafetería Chacala.  E no terceiro lugar ficaron empatados o ‘Beso de Mar y queso’, do Bar Encontro, e a ‘Volta do Cocido’, da cafetería Ameixa I.

O xurado

O xurado estivo constituído polo cociñeiro José Manuel Mallón (D’Antaño Foods & Service); Isabel Barral, en representación da Queixería Barral, de Arzúa; o cociñeiro Óscar Miranda, divulgador gastronómico en Radio Arzúa; Jesús Rodríguez, cociñeiro e copropietario da cafeteria Ultreia, e Óscar Pérez Ramil, secretario-xerente do consello regulador.

No concurso tomaron parte dezanove establecementos da hostalaría da vila de Arzúa, que elaboraron as súas creacións con queixo cedido gratuitamente polo Consello Regulador.

Como no ano anterior, polo elevado número de locais participantes,- foi necesario realizar unha cata previa. Nesa preselección o xurado estivo conformado por profesorado e alumnado de varios ciclos formativos da EFA Piñeiral de Arzúa, acompañados por persoal do consello regulador.

Domingo de festa

Arzúa deu hoxe sábado o pistoletazo de saída a unha nova edición da Festa do Queixo cunha primeira xornada que destacou pola elevada participación de público, o ambiente festivo nas rúas e unha programación pensada para todos os públicos.

Desde primeiras horas da mañá, o recinto feiral ‘Terra do Queixo’ converteuse no epicentro da celebración, coa apertura dos postos das queixerías participantes, que ofreceron degustación e venda do produto estrela desta cita gastronómica. Visitantes chegados de diferentes puntos de Galicia e de fóra da comunidade achegáronse para gozar dun evento que combina tradición, calidade e identidade local.

A xornada estivo marcada tamén pola celebración do pregón, que este ano correu a cargo de Federico Rey, quen puxo en valor a tradición queixeira de Arzúa e o sentimento colectivo arredor dunha festa que é xa símbolo de identidade para a vila.

No marco do acto institucional fíxose entrega do xa sinalado premio do concurso de petiscos .
Esta edición da Festa do Queixo rende homenaxe á emigración, recoñecendo oesforzo e a pegada das persoas que tiveron que marchar fóra e que contribuíron, desde adistancia, ao desenvolvemento económico e social da vila. A lembranza e o agradecemento ás persoas emigradas estiveron moi presentes durante o acto.

Este domingo é o día grande do feiral.
                                                                                                                                                                                                                                                                                                                                             

QdG

As vendas do queixo Arzúa-Ulloa, seguen a gozar de boa saúde. Xunto coas sinerxias da celebración do 50 aniversario de exaltación desde produto, que volveron dar un tirón nas cifras do ano 2025, a instalación de supermercados e tendas no norte de Portugal e de España, está elevando  moi significantivamente as vendas fóra de Galicia. Luis Lamas, presidente do Consello Regulador da Denominación de Orixe Protexida (DOP) Arzúa-Ulloa, cifra nun 40 por cento as vendas no exterior.

Pregunta.- Como ve a evolución do queixo Arzúa-Ulloa despois dos fastos deses 50 anos conmemorativos?

Resposta.- A festa ten o seu recoñecemento e o seu mérito, porque empezou de nada e cada ano segue aumentando tanto as cifras de volume de negocio como de visitantes e mellorando tamén todos eses datos coñecidos.

P.-  Canto se vendeu no 2025?

R.- En quilogramos creo que a suba andou nun 15 por cento. E nisto inflúe un pouco no crecemento da DOP Arzúa-Ulloa a evolución que se está a dar das vendas fóra da comunidade autónoma.

P.- Aproximadamente, de canto se pode falar en termos relativos?

R.- Pois hoxe debe estar preto dun 40 por cento das vendas.

P.- E onde están eses ‘nichos’ principais de demanda?

R.- Estase medrando moito agora -e non é tema que soprenda- no caso de Portugal, sobre todo no norte do país veciño. Pasa un pouco como en España, onde crecemos e máis se vende o nóso produto é tamén na zona norte.

En Portugal, sobre todo ultimamente, pode que pola aterraxe alí de supermercados como Mercadona. Tamén abriron algunas tendas, co que é una forma de levar o noso produto por España e fóra dela.

P.- O obxectivo para medrar está, cada vez máis, fóra da comunidade autónoma…

R.- Se cotexamos as cifras de consumo de queixo tanto en Galicia como en España e a nivel europeo, aínda nos falta moito, é algo que vai lento. Pero é certo que o que nos está repercutindo agora moito é o cremento fóra de Galicia.

Os prezos

P.- E os prezos, axuda que sigan sendo ben competitivos cara o produto que chega de fóra?

R.- Eu discrepo diso e dalgunhas outras opinións. Somos competitivos pero tamén hai que ter en conta que un quilogramo de queixo galego dura moito menos nunha casa que o que poida durar un queixo tipo manchego ou como lle queiramos chamar. O noso queixo queda en 12-13 euros, o queixo manchego en 18-20 euros. O que pasa é que un queixo galego, cunha botella de viño e uns amigos sentados disfrutando do produto case se vai; e co manchego xa non é tan doado. Ou sexa que o de competitivo é segundo se vexa. Se é polo prezo si, pero se é polo que acabo de expoñer, non tanto.

P.- Iso non quita de que sexa un queixo de referencia en Galicia…
​
R.- É moi bo, moi bo, pero rende menos.